Sa gjatë jetojnë shqiptarët?

Nga gjithë vendet e Ballkanit, shqiptarët janë populli me jetën më të gjatë, por renditja ndryshon kur në lojë hyjnë vendet europiane.

Sipas të dhënave të Eurostat, publikuar në një artikull të Monitor, jetëgjatësia e një burri shqiptar në 2017-ën ishte 77.1, ndërsa e një gruaje 80.1.

Jeta mesatare e një njeriu të linduri në Shqipëri është 78 vite e 6 muaj. Nëse më parë jeta e një gruaje ishte më e gjatë krahasuar me atë të një burri në vendin tonë, ky hendek është ngushtuar.

Nëse pjesë e listës së jetëgjatësisë janë edhe vendet europiane, nga 44 vende, Shqipëria renditet e 26-ta, por ndër të parat në vendet Ballkanike.

Edhe në vendet e Bashkimit Europian, burrat kanë tendencë të jetojnë 5.4 vjet më pak se gratë, të cilat jetëgjatësinë mesatare e kanë 83.5.

Megjithatë, jetëgjatësia në lindje në Shqipëri rezulton të jetë më e ulët se në Bashkimin Europian. Sipas Eurostat jetëgjatësia në lindje në 28 vendet e BE-së përllogaritet të jetë 80.9 vite, ku jetëgjatësia te burrat është 78.3, ndërsa te gratë 83.5.Mesatarisht, burrat kanë tendencë të jetojnë 5.4 vjet më pak se gratë në BE.

Zvicra, Liechtenstein, Spanja, Italia dhe Franca rezultojnë të jenë 5 vendet me popullsinë më jetëgjatë!