Çfarë mendon Sali Berisha për Ilir Metën?

Nga foltorja e Kuvendit, teksa fliste sot për Partinë Demokratike si promotore të reformës në drejtësi, Sali Berisha nuk harroi të përmendte edhe Ilir Metën, si “politikanin e vendosur pro konsensusit për reformën në drejtësi”.

Ish-Kryeministri foli jo pak sot, për pozicionimin e Lëvizjes Socialiste për Integrim pro konsensusit dhe kalimit të reformës. Madje Berisha shkoi edhe më tej, kur tha se LSI doli e fituar pas rrëzimit të projektit Rama- Xhafa për drejtësinë dhe largimit të saj nga koalicioni.

“Në këtë proces fitoi edhe LSI që në moment kritike mes konsensusit dhe bashkëqeverisjes zgjodhi konsensusin”-tha Berisha, teksa paralelisht përcaktonte Edi Ramën si dështuesin e madh të reformës.

Humbjen e Edi Ramës, Berisha e lidhi pikërisht me vendimin e LSI për të hartuar një projekt solid që e dërgoi paralel me projektin Rama­ Xhafa në komisionin e Venecias.

Në fjalën e Berishës dallohej  përpjekja për të legjitimuar ndarjen e Ilir Metës nga Edi Rama dhe kundërshtitë mes të majtëve për reformën në drejtësi.

“Rama futi në paketën e reformës propozimin sipas të cilit drejtuesit do zgjidheshin me votë të transferuar, e refuzuar kjo nga opozita si një praktikë e korruptuar. Këtu fitoi edhe LSI e cila pas rrëzimit të projektit Xhafa-Meta, u nda nga maxhoranca. Ajo me ekspertët e vet hartoi një projekt solid që e dërgoi paralel me projektin Rama­ Xhafa në komisionin e Venecias. Ajo i bëri me dije anëtarëve të Komisionit se ajo nuk ndante qëndrimin për të kapur drejtësinë”-deklaroi Berisha.

Por çfarë do të thotë kjo qasje në diskursin e Berishës me figurën e Ilir Metës?

Çfarë nënkupton ajo tani, në kushtet kur krisjet e koalicionit PS-Lsi janë mëse të dukshme dhe të konfirmuara nga deputetë të mazhorancës?

A është kjo, ajo që mendon realisht Berisha për ish-aleatin e tij në qeverisje?

Apo është thjesht një diversion që kërkon të ngacmojë edhe më shumë, plagën tashmë të hapur, mes Edi Ramës dhe Ilir Metës?