Edhe Bojaxhi shpall partinë, Muç Nano: Ja ç’duhet të bëjë Blushi

Vendit po i shtohen dy parti të reja.

Deputeti Ben Blushi zyrtarizoi dje në Kuvend largimin e tij dhe të Mimoza Hafizit nga grupi i Partisë Socialiste.

“…Ne largohemi sot (dje) si njerëz të lirë, të cilët besojnë se Rilindja i tradhtoi me ndërgjegje të varfrit dhe shtresën e mesme të këtij vendi, duke marrë vazhdimisht masa që cenojnë jo vetëm besimin e tyre te një rend demokratik, por duke i varfëruar ata edhe më shumë për shkak të masave represive, çnjerëzore, të cilat nuk ishin asnjë ditë reforma, por një eksperiment njerëzor që duhej të ushqente nënshtrimin para detyrimit dhe të testonte poshtërimin e dinjitetit në emër të dëlirit të pushtetit. Rilindja beson se një vend duhet të ketë shumë të varfër dhe pak të pasur, kurse ne besojmë se një vend duhet të ketë sa më pak të varfër, në mënyrë që të ketë më shumë të pasur dhe në këtë çështje ndoshta nuk do jemi kurrë dakord. Rilindja ka zgjedhur të mbrojë pakicën, ne duam të mbrojmë shumicën…”, tha Blushi ndër të tjera.

Po edhe edhe Gjergji Bojaxhi shpalli se do krijojë një parti të re, e cila do quhet “Sfida për Shqipërinë”.

“Unë jam anëtar themelues i lëvizjes dhe nuk jam kryetar i partisë, nuk kam ndërmend të jem kryetar i saj. Absolutisht do ta ndieja veten të nderuar, që në proceset e ardhshme ta përfaqësoja këtë parti. Të gjitha kandidaturat politike që do të nxjerrë ‘Sfida për Shqipërinë’ do të kalojnë një proces ‘një anëtar, një votë’. Kjo do të thotë se nuk mund të jesh një protagonist i lëvizjes, apo kandidat politik, nëse nuk kalon këtë proces”, tha Bojaxhi për “Top Channel”.

Ndërkohë, analisti Mustafa Nano ka disa këshilla për Ben Blushin, në një shkrim të botuar në Mapo.

“Ç’duhet të bëjë Blushi në këto rrethana? Gjëja e parë që duhet të bëjë është që të shkarkohet nga mllefi që është duke bartur. Në kokën e tij ka shumë Edi Rama, e Co., dhe të krijohet përshtypja se s’po e mban vendi vetëm e vetëm që t’u prishë punë këtyre. Duhet ta zbrazë kokën prej tyre. Këta mund të ishin një fiksim për Blushin për sa kohë ai ishte pjesë e PS-së. Tani nuk ka pse të kenë atë rëndësi. E them këtë, ngaqë është ky fiksim ndaj Ramës e Co., që i bën të tjerët ta shohin Blushin si një njeri të mllefosur, dhe kaq. Sidomos kur, për shkak të këtij mllefi, këput ndonjë mufkë, siç ishte ajo që këputi dje. “Saliu i vrau, por dikush i çoi në pritë”, tha ai, duke iu referuar viktimave të 21 janarit. Kjo është gjëja më e çmendur që mund të thuhet, kur flitet për 21 janarin,” shkruan Nano.

“Gjëja e dytë që duhet të bëjë Blushi është të heqë dorë prej protagonizmit në Kuvendin e Shqipërisë. Ai është një nga njerëzit më të fismë atje brenda, por duke u përpjekur të bjerë në sy për mirë në atë delirium, bën të kundërtën, bëhet njësh me të tjerët. Askush nuk mund të bëjë diferencën në këtë vend duke folur nga foltorja e Kuvendit. Ajo foltore është e Sali Berishës. Atij i ka hije. Atij i takon. Ka gati 30 vjet që e ka, tok me të ngjashmit, ku futet edhe Edi Rama. E prandaj, nuk mund të bërtasësh nga ajo foltore se je ndryshe nga të tjerët, të cilët atë foltore e kanë të tyren. Kuvendi i Shqipërisë është sot cepi më i ndyrë i territorit të republikës. E prandaj, Blushi duhet ta lërë mënjanë protagonizmin parlamentar, duhet ta mundë tundimin për t’u ngrënë me ata që janë atje, duke përdorur të njëjtat armë të tyre.

Gjëja e tretë është më e vështira. Gjithnjë, nëse Blushi bie dakord se duhet bërë. Ai duhet të mbledhë rreth vetes një grup njerëzish të fismë. Të gjejë edhe një duzinë njerëzish që kanë qibrën e Mimoza Hafizit. Nuk duhen më shumë”.