Një ndër fakultetet më të kërkuara në Shqipëri, fakulteti i Ekonomisë pranë Universitetit të Tiranës ka sot që shkruajmë 776 kuota të paplotësuara. Pra gjysma e vendeve në këtë fakultet aq të lakmuar nga maturantët janë bosh. Kjo shpallje bëhet zyrtarisht nga fakulteti vetëm dy ditë para nisjes së vitit të ri akademik.
Nëse studentët e vitit të parë duhet të zënë vend në auditor më 20 Tetor, fakulteti shpall vendet e lira sot më 17 Tetor dhe deklaron se afati për regjistrime është deri nesër më 18 Tetor.
“Numri i kuotave të paplotësuara për secilën degë përkatësisht është: 265 në Degën Financë, 279 në Degën Administrim Biznes, 156 në Degën Informatikë Ekonomike dhe 76 në Degën Ekonomiks. Regjistrimi për këtë raund fillon në datën 17.10.2016, ora 08:00 dhe përfundon në datën 18.10.2016, ora 19:00”, thuhet në njoftimin për mediat. “Theksojmë se, maturantët që nuk regjistrohen në asnjë nga degët ku janë shpallur fitues në datat 17-18 Tetor, në fazat pasardhëse humbasin të drejtën e studimit në FE-UT”, thuhet më tej nga fakulteti.
Ky njoftim lë vend për shumë dyshime….
A u bë skema e pranimit në universitete e tillë që maturantët të detyrohen të braktisin shtetërorin dhe të shkojnë në privat?
Pse janë gjysma e degëve bosh tek Ekonomiku, kur duhen dy ditë që të nisë viti akademik?
A u regjistruan në universitetet private, nga frika se do të mbeten pa shkollë, me qindra maturant ?!
A ishte pikërisht Ministria e Arsimit që bëri të rinjtë konfuzë dhe me pak shpresa për të fituar edhe pse kishin pikët maksimale?
Një pyetje publike për Ministrinë e Arsimit: Sa kuota keni në total në lira në universitetet publike? Dhe sa maturantë janë regjistruar këtë vit në institucionet e arsimit të lartë privat?
/R.Dedaj-Opinion.al
Duhet të jeni i kyçur në mënyrë që të mund të lini një koment Kyçu