WikiLeaks zbulon “lidhjen” ndërmjet Erdoganit dhe ISIS

“WikiLeaks” ka publikuar listën e e-maileve privatë nga llogaria e ministrit turk, Berat Albayrak, dhëndër i presidentit të Turqisë, Recep Tayyip Erdogan. Nga emailet zbulohen lidhjet ndërmjet Albayrak dhe një kompanie të përfshirë në marrëveshje me rafineritë e naftës që kontrollohen nga grupi terrorist, Shteti Islamik (ISIS).
Rreth 60.000 e-maile, të publikuara ditën e hënë nga WikiLeaks përfshijnë periudhën ndërmjet prillit të vitit 2000 dhe shtatorit të vitit 2016.
Emailet zbulojnë se Albayrak kishte mjaft njohuri për stafin dhe pagat në “Powertrans”, një kompani të cilës i ishte dhënë monopol në transportimin rrugor dhe hekurudhor të naftës në vend nga Kurdistani, raportojnë mediat e huaja.
Mediat turke patën raportuar më 2014 dhe më 2015 se “Powertrans” ishte akuzuar për përfshirje në tregtinë e naftës së prodhuar nga ISIS në Sirinë fqinje dhe për transportim të saj drejt Turqisë, ndonëse akuzat nuk ishin mbështetur nga ndonjë dëshmi e fortë.
Ministri turk, Berat Albayrak më herët ka mohuar çfarëdo lidhje me kompaninë “Powertrans”.