Për të dytin vit çifti kryeministror Edi dhe Linda Rama kanë mbledhur gazetaret femra në një darkë super-lulsoze me rastin e festave të fundvitit. Ajo është zhvilluar në restorantin luksoz “ABA 21”.

Megjithë përpjekjet për të mbajtur të rezervuar për mediat (e sidomos për portalet) detaje nga kjo darkë, organizatorët nuk ia kanë arritur sërish. “Lapsi.al” mësoi se e ftuar speciale këtë herë ka qene edhe shkrimtarja Elena Kadare.

Nuk kishin si të mungonin Alba Malltezi, Iris Luarasi, Rudina Xhunga, Ilva Tare, Alketa Vejsiu, Mira Kazhani, Zana Çela, Monika Stafa, Beti Njuma, Jonida Shehu. Vlen të theksohet se, një darkë paralele me atë të Linda Ramës mbajti edhe “zonja e parë” e Tiranës Ajola Xoxa.

“Lapsi.al” mësoi se motoja e kësaj darke ishte “The best is yet to come” (Më e mira do të vijë). Kjo frazë ishte shkruar edhe në monedhën e kulaçit që i ka rënë gazetares Sonila Pepa.

Gazetaret janë pritur nga Linda Rama ndërsa kryeministri i është bashkuar darkës më vonë ku nuk i ka kursyer batutat.

Prania e kryeministrit mes grave është shoqëruar me batuta. Ai ka bërë shaka me gazetaren Anila Basha, të cilën e ka komplimetuar për rënien në peshë.

“Shyqyr që i hoqe ato 7 kilogramë se sa hapja Facebook-un më dilje ti duke bërë palestër”,- ka thënë Rama. Ndërsa me humor ai i është drejtuar gazetareve “Ju jeni shtriga”.

Ky moment është shoqëruar me të qeshura. Në tavolinë është shërbyer përgjithësisht verë e kuqe. Megjithëse një darkë jozyrtare, nuk kanë munguar edhe fjalimet. Edhe këtu disa gazetare nuk i kanë shpëtuar mikrofonit. Darka nisi rreth orës 21.00 dhe ka zgjatur deri pas mesnate.