Ish-Ministri i Drejtësisë Ylli Manjani deklaroi se shkarkimi i tij është hakmarrje e Kryeministrit Rama pas deklaratave të tij për kanabizimin e vendit, mosarrestimin e Klement Balilit, si dhe për faktin se nuk pyet Drejtorin e Komunikimit të qeverisë Endri Fuga për deklaratat e tij.

Më poshtë janë disa nga deklaratat më të forta të Zotit Manjani për këto çështje, bërë gjatë mandatit të tij si ministër i Drejtësisë, që prej nëntorit 2015.

Për luftën ndaj kanabisit:

Janar 2017

• Problemi është shumë serioz. Duhet të shkulim hashashin nga toka dhe koka e shqiptarit.

• Fenomeni ekziston dhe ekziston në mënyra të frikshme. Shqipëria po jep një imazh gjithnjë e më shumë që po kultivon hashash.

• Për të shkuar partizan në mal tek hashashi, çmimi luhatet nga 20 mijë deri në 40 mijë lekë. Pra njerëz që i shihnim rregullisht, këto kohë kanë preferuar të dalin partizanë e të bëjnë këtë punë të paligjshme.

Tetor 2016

• Nga ky fenomen ose ndahemi tani që sa ka filluar ose nuk ndahemi më, ose kur të ndahemi do të jetë shumë e vonshme.

Për mosarrestimin e Klement Balilit

Janar 2017:

• E njoha Balilin në maj të vitit të shkuar kur Ardian Çipa na ka njoftuar se Klement Balili është vënë në kërkim ndërkombëtar dhe që në maj ai duhej të ishte arrestuar dhe të vihej në dispozicion të prokurorisë shqiptare.

• Kam kërkuar që në 12 maj arrestimin e Klement Balilit. Pyes sesi ka mundësi që nuk është arrestuar. Unë nuk e di se përse. Nuk e drejtoj unë Policinë e Shtetit.

17 Dhjetor 2016:

• Me rastin e të 7-tave (muajve të urdhër-arrestit ndërkombëtar) edhe njëherë tërheq vemendjen: Ta arrestojë [Klement Balilin] kush e ka në dorë!

7 Dhjetor 2016:

• Dua t’i sjell në vëmendje se Ministri i Drejtesisë nuk është as Prokuror, as Gjykatës e as Polic! Që do të thotë kushdo që e ka në dorë për ta arrestuar e gjykuar ligjërisht Klement Balilin dhe këdo tjetër bën mirë ta bëjë!  Këtë gjë e kam thënë që në muajin maj të këtij viti dhe nuk e ndryshoj aspak qëndrimin!

15 dhjetor 2016:

• Mbështes plotësisht shqetësimin e shprehur ditën e djeshme nga Ambasadori i Shteteve të Bashkuara të Amerikës, z. Donald Lu në lidhje me mos arrestimin e shtetasit Klement Balilit. Prej 7 muajsh dhe në mënyrë të përsëritur e kam shprehur dhe publikisht këtë shqetësim.

• Ligji shqiptar përcakton qartë se kush arreston, kush ndalon, kush akuzon dhe kush dënon persona të përfshirë në shkeljet e ligjit. Askush të mos fshihet pas alibive të sajuara, por të marrë përgjegjësitë që i jep ligji dhe t’i ushtrojë.

17 Dhjetor 2016:

• Me rastin e të 7-tave (muajve të urdhër-arrestit ndërkombëtar) edhe njëherë tërheq vemendjen: Ta arrestojë kush e ka në dorë!

Për Qeverinë Rama-Meta

12 janar 2017:

• Unë nuk mund të konceptoj që ministri duhet t’i marrë leje Endri Fugës për të dhënë një intervistë.

• Kam propozuar disa projektligje, nuk e di pse nuk kalojnë. Nuk jam ende në pozitën që të dal në konkluzionin që qeveria ku unë bëj pjesë është një qeveri monstruoze.

• Ne kemi besuar dhe besojmë edhe sot që zgjedhjet i ka fituar e majta e bashkuar. Zgjedhjet i kemi fituar me Ben Blushin, jo me Shpëtim Idrizin.

• Ne duhet të sqarojmë të konsolidojmë të majtën e bashkuar, jo të bëjmë një koalicion numrash. Ky është mendimi im, jo i LSI-së.