Meta jep detaje nga takimi me kryeministrin

Takimi mes Edi Ramës dhe Ilir Metës në ambientet e “Hotel Tirana”, ka zgjatur për rreth 1 orë e 20 minuta. I pari që është larguar ka qenë kryeministri Rama, duke ia lënë në dorë aleatit të tij, Meta të japë detaje nga takimi.

“Dëshiroj të theksoj se qëllimi kryesor i këtij takimi ishte rritja e përpjekjeve tona për të garantuar paprekshmërinë e votës së qytetarëve shqiptarë si themeli i një shoqërie europiane. Me këtë rast shprehim vullnetin për të nisur një dialog pa kushte me opozitën dhe drejtuesit e saj. Së dyti, kemi vendosur të vazhdojmë procedurat kushtetuese për zgjedhjen e presidentit të ri, por pa paraqitur asnjë emër, pa dialoguar dhe pa bërë përpjekje për të arritur konsensusin dhe me opozitën për çështjen e presidentit, edhe pse kjo maxhorancë ka gati 90 vota në Parlament. Së treti, duke parë vështirësinë e opozitës për të pasur besim, dhe kjo është arsyeja pse dialogu ende nuk ka nisur, kemi vendosur që t’i drejtohemi zyrtarisht Partive Popullore Europiane, ku dhe PD është anëtare, që të asistojë sa më shpejt të jetë e mundur në këtë dialog në mënyrë që ky ngërç të marrë fund sa më shpejt dhe vendi të shkojë drejt zgjedhjeve të lira, të qeta, demoratike dhe të ndershme dhe po kështu dhe procesi i integrimit europian dhe të gjithë reformave të jetë i suksesshëm”- u shpreh Meta.

Ai nuk ka folur për fatin e koalicionit duke thënë se nuk është kjo e rëndësishme.