Në Irak shkuam për ta rrëzuar Saddamin, jo për të sjellë demokraci

Synimi kryesor i SHBA-së gjatë pushtimit të Irakut në vitin 2003, nuk ishte sjellja e demokracisë në vendin e Lindjes së Mesme, por të rrëzohej Saddam Hussein, ka deklaruar Condoleezza Rice, Sekretare e Shtetit në Administratën e George W. Bush.

“Shkuam në Irak për ta rrëzuar Saddam Hussein, për të cilin mendonim se po rindërtonte armë të shkatërrimit në masë, dhe për të cilin e dinim se ishte kërcënim për rajonin. Ishte problem i sigurisë,” ka thënë Rice.

“I rrëzuam talebanët sepse po e strehonin Al-Qaedan në vend të sigurt pas sulmeve të 11 shtatori,” ka shtuar ajo.

“Kurrë nuk do t’i thosha presidentit Bush: Përdore forcën ushtarake për të sjellë demokraci në Irak dhe Afganistan”, ka thënë ajo.

Në vitin 2003, Bush e autorizoi pushtimin amerikan të Irakut, duke pohuar se Saddam Hussein posedonte armë të shkatërrimit në masë dhe se po punonte me terroristët që e kishin sulmuar SHBA-në në shtator të vitit 2001.

Asnjë nga këto pohime nuk dolën të ishin të sakta.

Në nëntor të vitit 2006, Saddam Hussein u shpall fajtor për krim kundër njerëzimit dhe u dënua me vdekje.

Ai u ekzekutua me varje në dhjetor të vitit 2006.