Kryeministri ‘vjedh’ modelin e Qytetarit Dixhital

Kryeministri Edi Rama poston sot në selinë virtuale të qeverisë shqiptre – në Facebook – një listë me 100 emra nëpunësish dhe pjesëtarësh të sistemit të drejtësisë, të cilët akuzohen nga komentuesit online se kanë shkelur ligjin ose kanë marrë rryshfet. Eksperienca negative – kështu i klasifikon Rama këta persona që sot shohin emrin t’u shfaqet në një faqe vetëm pse dikush ka shkruar një koment.

Mbetet për t’u parë se çfarë ndodh tani me këta njerëz, por duhet kujtuar se vendi i punës, emërimi dhe shkarkimi, rregullohet me ligj. Ankesat në këtë mënyrë siç provokon kryeministri provojnë ndër të tjera dështimin e plotë të linjës hierarkike në administratë për të reaguar, duke i lënë kreut të qeverisë këtë mundësi që është shumë arbitrare.

Kryeministri shkel qysh tani prezumimin e pafajësisë për personat që akuzohen në tym online, pasi dalja e emrit në Facebook implikon “regjistrimin” e akuzës dhe fajësinë publike. Ndërkohë që njerëzit kanë dinjitetin e tyre dhe fajësinë ose jo ua provon tjetër kush. Qysh tani, në një shtet normal, personat në fjalë mund të hedhin në gjyq kryeministrin që i përflet në këtë mënyrë, pa folur këtu për faktin se praktika në fjalë, nuk është asgjë më shumë sesa një imitim dhe vjedhje e praktikës së Qytetarit Dixhital të Sali Berishës. Duket se Edi Rama e ka vuajtur shumë denoncimin e qytetarit dixhital saqë po mendon ta neutralizojë në këtë formë. Kjo vetëm qeverisje nuk është.