Tre fëmijët e tij kanë studiuar në Amerike por Erdogani quan spiunë të rinjtë turq që studiojnë në Perëndim

Presidenti turk Rexhep Taip Erdogan ka thënë se të rinjtë turq që studiojnë në Perëndim kthehen si spiunë vullnetarë, pavarësisht se tre prej fëmijëve të tij kanë kryer studimet në Shtetet e Bashkuara, shkruan gazeta britanike Telegraf.

Duke folur në një ngjarje në Nju Jork, kreu i shtetit turk ka thënë: “Ata që janë dërguar në Perëndim për t’u arsimuar erdhën me kulturë perëndimore, duke e humbur identitetin e tyre. Ata të cilët vendi i priti për t’i zgjidhur problemet, erdhën si spiunë vullnetarë të Perëndimit”.

Erdogani është babai i katër fëmijëve, tre prej të cilëve kanë kryer shkollimin në universitete amerikane.

Vajza e tij Esra dhe djali Bilal kanë kryer studimet në Universitetin e Indianës, kurse vajza tjetër ka kryer studimet master në Shkollën Universitare për Çështje Publike dhe Mjedisore.

Bilal Erdogan ka marrë edhe një master në politikën publike të Shkollës së Qeverisjes ‘John F Kennedy’.

Shumë prej anëtarëve të vjetër të kabinetit të tij kanë studiuar po ashtu në Perëndim.

Në fjalimin e tij, Erdogani ka theksuar faktin se për qindra vite turqit e rinj janë dërguar jashtë vendit për të studiuar, por janë kthyer me ide perëndimore.

“Ata që e përbuzin kombin e tyre, ata që përçmojnë vlerat e tyre, të jeni të sigurt për këtë se as armiqtë tanë nuk mund të na dëmtonin kaq shumë sa kanë bërë këtë të ashtuquajtur intelektualë”.

Komentet e presidentit turk kanë ndezuar reagime të forta në mediat sociale, ku shumë turq e kanë akuzuar atë për dyfytyrësi