Pas 23 vjetësh në krye, jep dorëheqje kryetari i Ankarasë

Kryetari i Ankarasë Melih Gokcek, ka deklaruar se do të jap dorëheqje gjatë kësaj jave, duke u bërë kështu kryebashkiaku i pestë që largohet gjatë javëve të fundit.

Doreheqjet po vijnë si pasojë e një kërkese për pastrimin e politikës lokale nga Presidenti Recep Tayyip Erdogan.

Melih Gokcek, një besnik i vendosur Erdogan i cili ka qenë kryetar i Bashkisë së Ankarasë për 23 vjet dhe fitoi pesë zgjedhje të njëpasnjëshme, përmes një postimi në Twitter tha se do të largohet nga posti të shtunën dhe ka shtuar se vendimi është marrë pas një takimi me Presidentin Erdogan.

Katër kryebashkiakë të tjerë nga partia qeverisëse tashmë janë larguar nga postet udhëheqëse, përfshirë kryetarin e Stambollit, Kadir Topbas.

Vendimi i Erdoganit për të ndryshuar kryetarët e bashkive erdhi pas fitores së ngushtë në referendumin e vitit të kaluar, ku nxorri në pah se ai ishte më i popullarizuar në zonat rurale se sa në ato urbane. Shtatëmbëdhjetë qytete të mëdha kanë votuar kundër tij.