Kryesore
INSTAT konfirmon: Të pasurit po bëhen më të pasur, të varfrit akoma më të varfër
Rritja e hendekut mes të varfërve dhe të pasurve, është një fenomen që po thellohet gjithnjë e më shumë në vendin tonë. Kjo është raportuar prej kohësh nga institucione të ndryshme financiare ndërkombëtare, por së fundi është dhe Instituti i Statistikave që e pohon një fakt të tillë.
Anketa e Buxhetit të Familjes për vitin 2016, tregon pikërisht këtë tendencë ku të pasurit janë pasuruar edhe më shumë, kurse të varfrit kanë vijuar në ekstremin tjetër.
Sipas kësaj ankete rreth 90% e familjeve shpenzojnë 78.3% të vlerës së konsumit gjithsej, me një mesatare të shpenzimeve për konsum prej 63.609 Lekë në muaj. Nga ana tjetër 10 % e familjeve shpenzon 21,7% të konsumit gjithsej, me një shpenzim mesatar prej 158.946 Lekë në muaj.
Kjo do të thotë se shpenzimet mesatare për konsum të 10% të NjEF me shpenzime më të larta janë 2,5 herë më shumë se ato të 90% tjetër më të varfër.
Konsumi për frymë, i 90% të familjeve me shpenzimet më të ulëta është mesatarisht 18.119 Lekë në muaj, ndërsa 10 % i familjeve me shpenzimet më të larta, është mesatarisht 62.562 Lekë në muaj për frymë.
“Raporti i 10/90 është 3,5 herë më i madh në favor të 10% të familjeve. Shpenzimet mesatare për konsum të NjEF tregojnë se në vitin 2016, ka pasur një rritje më të madhe të shpenzimeve të 10 përqindëshit të NjEF me shpenzimet më të larta (14,6 %) në krahasim me rritjen e shpenzimeve mesatare për konsum të 90 përqindëshit tjetër (0,6 %) në krahasim me 2015”, pohon INSTAT.
Vazhdo leximin
Duhet të jeni i kyçur në mënyrë që të mund të lini një koment Kyçu