KESHILLA: Rënia e flokëve te gratë, si ta luftojmë në… tavolinë

Mjekët thonë se rënia e rreth 80 fijeve në ditë mund të konsiderohet normale, por rritja e këtij numri mund të lidhet me tre faktorë kryesorë: stina, stresi dhe çrregullimi i ushqyerjes.

Një mënyrë e mirë për të luftuar rënien e flokëve  është ushqyerja me disa lloj ushqimesh të cilat janë të njohura për efektin e tyre pozitiv. Ja cilat janë ato:

Proteinat

Aleatët më të mirë kundër rënies së flokëve janë proteinat, të cilat gjenden me shumicë ne ushqime si vezët, gjeli i detit, bathët dhe peshku ton. Një efekt mjaft pozitiv mund të ketë edhe konsumimi i ushqimeve që përmbajnë hekur, një lëndë e cila ndikon kryesisht në kompaktësinë e flokut. Mungesa e hekurit shkakton hollimin dhe për pasojë edhe këputjen e fijeve. Ushqimet më të pasura me hekur janë mëlçitë, mishi i kuq etj.

Vitaminat dhe acidet yndyrore

Vitaminat B e B6 kanë një rëndësi thelbësore për shëndetin e flokëve. Vitaminat ndikojnë në forcimin e bulbit të rrënjës. Ato mund të gjenden me shumicë në drithërat integrale, vezë, majanë e birrës, grurë dhe peshk. Acidet yndyrore Omega 3 mund t’i gjejmë tek peshku dhe frutat e thata si bajamet, arrat dhe lajthitë.

Frutat dhe perimet

Jemi mësuar ta lidhim shëndetin e organizmit në tërësi me sasinë e madhe të konsumit të këtyre dy produkteve. Ato ndikojnë pozitivisht edhe për forcimin e flokut, për shkak të kripërave minerale dhe vitaminave të bollshme që kanë në përbërjen e tyre, të cilat luftojnë radikalet e lira dhe parandalojnë plakjen e flokut. Për këtë arsye, ato konsiderohen si shumë efektive për parandalimin e shfaqjes së thinjave.