Shkëlqimi dhe rënia e Kolonel Myslimit

“Në kohët e sotme, kjo koha moderne e qytetërimit e teknologjive të epërme të depërtimit ndër të fshehtat e botës, të perfeksionit dhe inteligjencës, në fluturimin e mendimeve që lindën mite, është në pakomandimin dot të këtij dimensioni që e ka me vete bashkësia njerëzore. Aq shumë e kemi toleruar qytetarin përmjet lirisë së të shprehurit në mediume e portale pafund të mbushur me fëlliqësira”.

Kështu shkruan në një postim të tij në rrjetet sociale, kolonel Myslim Pashaj, një nga emrat më të lakuar së fundmi në median online.

Njeriu që kundërshtoi paktin detar me Greqinë gjatë kohës së qeverisjes së Sali Berishës, tashmë e gjen veten në krahun e kundërt. Ai që e kishin vlerësuar dhe adhuruar kaq shumë në rrugë dhe në rrjetet sociale, tashmë është në qendër të furtunës.

Madje duket se Pashaj është trazuar shumë prej postimeve që i bëhen kundër, sa ka vendosur t’u kthehet duke u thënë se ‘qytetarin e kemi toleruar shumë nëpërmjet lirisë së shprehjes’.

Personi, të cilit i referohet, është një profesor i gjuhës shqipe në Prishtinë, i cili thotë se do të dalë të protestojë kundër dhënies së detit Greqisë nga qeveria e Edi Ramës.

“Nesër ky njeri do të dalë të protestë, për të ruajtur integritetin e Republikës së Shqipërisë. Se ia paskan shitur detin… O det i mjerimit dhe dëshpërimit!”shkruan Pashaj.

Por përse ky ndryshim?

Pashaj ishte i pari që doli me vizore e kompas kundër ndarjes së detit. Shpallja e tij ‘hero’ në media e bëri efektin më shumë se ç’duhet. Me plis në kokë ai u bë pjesë e një fushate ku fjalët ‘tradhti’, ‘shitje’ dhe ‘shuma të mëdha monetare’ kërcisnin para syve të shqiptarëve.

Pashaj u bë simbol i nacionalizmit në rritje dhe mediat i kërkonin mendim për shumë gjëra. Dhe ai nuk ngurronte, duke u shprehur deri edhe se duhet rivlerësuar Enver Hoxha e duhet hequr ai monument i Zogut në Tiranë.

‘Flaka’ e nacionalizmit u bë kaq e madhe, sa ndonjëherë del jashtë kontrollit.

Kur ministri i Jashtëm grek tha se Shqipëria ka pranuar që t’u japë 12 milje zgjerim në det, atëherë rrjeti shpërtheu në të kundërt dhe kërkoi me dëshpërim një fjalë nga Pashaj. Ky i fundit u tha se nuk ka akoma asnjë marrëveshje.

Por askush nuk gjeti qetësi. Disa thonë se koloneli nuk flet për shkak të një krushqie në nivele të larta, të tjerë thonë se dihej përfundimi.

Tek e fundit, Greqia e ka në dorë Shqipërinë sa kohë mund t’i bllokojë integrimin.

Morali i fabulës?

Ndoshta ajo që zakonisht njerëzit korrin atë që mbjellin./Mapo.al