Lagjet më të famshme të Tiranës: Cilat janë dhe për çfarë shquhen

Tirana nuk është vetëm Blloku.

Tirana e vërtetë është në periferi, aty ku ndodh e paimagjinueshmja.

Ja cilat janë lagjet më të famshme të Tiranës dhe pse janë të famshme

Kombinati – I famshëm për kampionatin e dominosë dhe bandat e reperëve me çmime Grammy

Mr. Elvis, çunat e Kombinat Rap City, janë të gjithë çuna Kombinati. Nuk dihet nëse Kombinati është bërë i famshëm prej tyre apo ata janë bërë të famshëm nga Kombinati, e sigurtë është se i gjithë Kombinati i njeh.

Megjithatë, ata të gjithë janë spektatorë kur vjen dita e kampionatit të dominosë mes pleqve të Kombinatit. Dita e kampionatit të dominosë në Kombinat është çdo ditë.

Komuna e Parisit – E famshme sepse duhet të kesh patjetër dikë që jeton atje

Komuna e Parisit është një lagje që nuk mund ta përshkruash me fjalë. Kur të pyesin: “Po pse është kaq e famshme kjo lagje?”, ti nuk ke një përgjigje. Por një gjë e di me siguri, ke një ose më shumë të njohur që jetojnë atje. Shpesh shkon atje për të pirë kafe. Është një rrëmujë e paparë, plot me njerëz dhe trafik në një rrugë kryesore që është shumë e ngushtë për dy makina, sepse është plot me makina të parkuara rrëzë trotuarit.

Don Bosko – I famshëm për përmbytjet në dimër dhe për xhepistët

Legjenda thotë se tek Don Bosko të marrin telefonin nga dora dhe nëse bën rezistencë, ta marrin me gjithë krah.

Duke qenë një prej lagjeve më të njohura dhe më të populluara, Don Bosko është qendra e disa mediave shqiptare e megjithatë, në 2014-ën u bë më shumë e njohur si “zona e përmbytjeve” pasi u përmbyt disa herë nga shirat.

Megjithatë, mbetet një vend i pëlqyer për shumë njerëz, pasi ka kafene shumë të këndshme ku mund të shkosh edhe me fëmijët.

Rruga e Durrësit – Për shëtitjet dhe tironsit e vjetër

Rruga e Durrësit është shumë e njohur si shëtitore, sepse të ofron çdo gjë që të duhet që nga dyqanet e veshjeve, tek kafenetë e hapura, akulloret dhe ëmbëlsirat, serviset e telefonave por edhe agjencitë turistike dhe ato të postave të shpejta.

Më parë, tek Rruga e Durrësit jetonin familjet më të privilegjuara, kurse sot edhe pse popullsia është përzier, ka shumë tironsë të vjetër që jetojnë akoma atje. Ndërsa rruga kryesore është plot me ndërtime moderne, nëse futesh pak më thellë mund të gjesh shtëpitë e bardha me qerpiçë.

Kinostudio – E famshme për Kinostudion dhe televizionet

Pothuajse çdo media e madhe shqiptare është vendosur në zonën e Kinostudios. Është një zonë e banuar, sigurisht, por kjo periferi e Tiranës shërben si qendra e medias audio-vizive shqiptare, ku gjenden studiot dhe zyrat e televizioneve.

Gjithashtu, aty janë të vendosura Kinostudioja, shtëpia shtetërore e filmit shqiptar dhe shkolla e filmit dhe multimedial  “Marubi”.

Blloku – I famshëm sepse ka qenë i ndaluar

Kjo lagje që dikur ishte e ndaluar për njerëzit e thjeshtë sepse këtu jetonin anëtarët e byrosë, sot është lagja më e famshme për argëtimet, për jetën e natës. /Anabel.