Tirana, “kryeqyteti” i gjobave!

Policia rrugore ka llogaritur se mesatarisht çdo ditë në Tiranë qarkullojnë 200 mijë automjete, ku përfshihen edhe makinat rezidente.

Në kryeqytet vendosen çdo ditë 500-600 gjoba për shkelje të Kodit Rrugor. Shkelja më e shpeshtë e shoferëve është; ajo e qëndrimit të gabuar, për të cilën gjobiten çdo ditë nga 150 deri në 170 qytetarë, tejkalimi i shpejtësisë, përdorimi i telefonit dhe alkooli.

Të dhënat zyrtare për vitin e kaluar tregojnë se 103 mijë qytetarë u gjobitën për parkim të gabuar, duke dërguar në arkat e shtetit një shumë prej 117 milionë lekë. Në vend të dytë për shkelje janë shoferët që përdorin telefonin gjatë drejtimit të mjetit. Për këtë shkelje janë gjobitur 70.236 qytetarë, që i kanë dhënë shtetit 75 milionë lekë dhe në vend të tretë janë shoferët që parakalojnë në mënyrë të gabuar. Këto të fundit rezultojnë të jenë 217 shoferë, të cilët kanë nxjerrë nga xhepat e tyre në total më shumë se 83 milionë lekë.

Nuk ngelen pas edhe shkelja e mbishpejtësisë dhe mosrespektimi i semaforit. Në disa raste, qytetarët gjobiten edhe me pa të drejtë dhe ka nga ata që e çojnë çështjen në gjykatë.

“Ata justifikohen në gjykatë, disa thonë nuk e kam kryer shkeljen, disa më ka inat policia, por ajo që vë re unë është se nuk ka më padi sa në 2014-n, ka më pak. Ka nga ata që vijnë në gjykatë dhe thonë më kthe patentën se humbas vendin e punës”, tregon juristja e Policisë së Tiranës, Entela Selmanaj për Top Channel.

Megjithatë, masa administrative më e prekshmja është ajo e arrestimit të shoferëve që mbajnë timonin në gjendje të dehur. Vitin e kaluar u arrestuan 1003 shoferë të dehur, të cilët kanë rrezikuar përveç patentës, edhe lirinë.