Me datë 15 Dhjetor të gjithë shqiptarët në mbështetje të Jurgenit

Boksieri lezhian Jurgen Uldedaj, 9 fitore dhe asnjë humbje në karrierën e tij si profesionist, do të zhvillojë më datën 15 dhjetor në sallën “Feti Borova”, pranë Tirana Olimpik Park duelin e vlefshëm për titullin kampion bote në kategorinë WBO Junior. Kjo sfidë do të zhvillohet në peshën “cruiserweight”, ndërkohë që së shpejti do të mësohet edhe emri i rivalit të boksierit Uldedaj, 21 vjeç.

Lezhiani prej 3 vitesh ka nisur karrierën e tij si boksier profesionist, duke u stërvitur me ekipin gjerman të SES Boxing dhe pas 8 duelesh të zhvilluara në Gjermani e një në Poloni, më në fund do të duelojë edhe para publikut të tij shqiptar. Dhe këtë gjë do ta bëjë në një sfidë të rëndësishme për të, pasi do të duelojë për titullin kampion bote për kategorinë WBO Junior.

Në shkurt të këtij viti, Uldedaj fitoi titullin “International German Master” dhe tani po hedh një tjetër hap të rëndësishëm në karrierën e tij. Në një postim në faqen e tij zyrtare në “Facebook”, lezhiani kërkon mbështetjen e fansave shqiptar. “Mbështetja juaj është forca ime. Ju ftoj të më përkrahni në “Olimpik Arena”, shkruan Jurgen Uldedaj, që synon edhe fitoren e 10-të si boksier profesionist.