Shqipëria, për ku kështu?!

Opinion nga Ardit Haxhija profesor ne  American College of the Middle East

Zhvillimet më të fundit në vend sollën në vëmendjen e gjithësecilit batakun në të cilin jemi katandisur, e ku vështirë të dilet. Individët që deri dje ishin në pushtet, dhe nuk lane të zezë pa i bërë ketij vendi, kërkojnë të rikthehen e të vazhdojnë aty ku e lanë. Individët që jane sot në pushtet, dhe që për 6 vite kanë bërë shumë pak ose aspak pe Shqiperine, shesin dëngla nga mëngjesi deri në darkë, gjoja jane ‘drejtimi i duhur.’

Individët e djeshem, jane ata që shkatërruan nga themeli arsimin, shëndetesinë, drejtësinë. Ndersa individët e sotem jane ata që nuk bënë as tentativën më të vogël, për t’i përmiresuar, përkundrazi krijuan mekanizma vjedhjeje dhe më galopantë, ku shembulli më flagrant është shëndetesia. Individët e djeshem u akuzuan shpesh here me zë dhe me figurë për vjedhje, shantazhe, vrasje, ndersa  sot kerkojnë “drejtësi” për padrejtesitë që vete na i mësuan. Individët e sotëm, të akuzuar me zë dhe me figurë, për drogë, vjedhje, e kriminelë në mesin e tyre, na thone ta shohim të keqen si diçka që na vjen nga jashtë. Individët e djeshëm që mbyllën dyert e çdo profesionisti dhe hapën dyert e soj sorollopi te paafte, kërkojnë me çdo kusht rikthimin e këtyre njerëzve.

Individët e sotëm, që erdhën në pushtet po me një tufë të paaftësh, me kabinetin ministror më qesharak te pare ndonjëherë, i shkarkojnë njerezit për arritje rezultatesh te larta. Individët e djeshëm që humbën pushtetin nga aleati i tyre, kërkojnë pushtetin po me këtë aleat. Individët e sotëm që kërkuan tepsinë për Shqipërinë që duam, morën tepsinë por harruan Shqipërinë.

Shqipëria dje nga sot ndryshon shumë pak, pasi ata që ishin dje janë dhe sot. Shqipëria dje nga sot ndryshon shumë pak, pasi ata që duhet të bëjnë ndryshimin përbuzen, kanë ikur ose janë në pritje për të ikur. Shqipëria dje nga sot ndryshon shumë pak, pasi e keqja e vogël dominon te miren e madhe. E keqja e vogël me idiotësinë e saj del e bërtet duke krijuar idenë se është e madhe, ndërkohë e mira e madhe struket në shtëpi me frikën se është e vogël. Deri kur kështu Shqipëria jonë?! / Podiumi.com