Spahia akuzon Ramën për mashtrim: 100 pacientë kurohen falas në Turqi prej vitit 1999

Spahia shkruan në Facebook se “marrëveshja për kurimin e 100 pacientëve” është thjesht rinovim formal i asaj marrëveshje që funksionon prej vitit 1999 në Ministrinë e Shëndetësisë.

Përfaqësuesi i Partisë Demokratike, Bardh Spahia thotë se trajtimi falas i 100 pacientëve shqiptarë në vit në Turqi nuk është diçka e re, por rinovim formal i një marrëveshjeje që funksionon prej vitit 1999.

Gjatë ditës së parë të vizitës zyrtare në Turqi të kryeministrit Rama, u firmosën edhe disa marrëveshje, ndër të cilat edhe ajo e bashkëpunimit në shëndetësi. Një nga pikat e saj parashikon trajtimin falas në Turqi për 100 pacientë shqiptarë në vit në raste emergjente.

Ish-deputeti Spahia shkruan në Facebook se “marrëveshja për kurimin e 100 pacientëve” është thjesht rinovim formal i asaj marrëveshje që funksionon prej vitit 1999 në Ministrinë e Shëndetësisë. Ai akuzon kryeministrin Rama se ka mashtruar duke e shitur këtë si sukses të tijin.

“100 pacientë janë kuruar cdo vit prej vitit 1999 në Turqi. Madje gjatë vitit 2010, 2011 dhe 2012 falë bashkëpunimit e mirëkuptimit me palën turke numri i pacientëve shqiptarë të trajtuar në Turqi shkoi deri në rreth 130 në vit dhe 84 pacientë u kuruan në spitalet italiane. Madje 10-15 mjekë të rinj trajnoheshin cdo vit për traumat dhe emergjencat në Turqi.”

Spahia akuzon ministren Manastirliu se ka djegur 40 vende për trajtim shëndetësor në vitin 2019 pasi “dosjet e pacientëve mbahen në sirtarët e ministrisë për t’u verifikuar përkatësinë politike”.

“Këto janë sjellje cnjerëzore, që tregojnë se si shëndeti i qytetarëve të këtij vendi shihet si mundësi për përfitime politike e monetare! Shtoji këtyre edhe talljen e mashtrimin publik si në rastin e rinovimit të marrëveshjes për 100 pacientë në vit, kjo është fytyra e qartë e Edi Ramës dhe e të zgjedhurve të vet: të paaftë, makutë e të paturp deri në palcë!”