Më 26 prill, një ditë pas disfatës për herë të tretë në zgjedhjet parlamentare (më 2013 ishte Berisha kryetar), Lulzim Basha, shefi i palës humbëse, Partisë Demokratike, u shfaq në shkallët e mëdha në hyrje të selisë blu për të bërë një deklaratë. Më saktë për fjalimin e humbjes dhe të ngushëllimit për mbi 600 mijë demokratë që kishin votuar siglën bardhë-e-blu të PD. Sërish 60 mijë më pak se sa në humbjen e parë të zinxhirit të humbjeve, që kur partinë e mori Basha, vitin 2013. Shifër e rikonfirmuar nga paraadhësi i Bashës në PD, Sali Berisha në një intervistë të së hënës mbrëma me Erla Mëhillin në Euroneës Albania.

Dekorin e Bashës mbrëmjen e 26 prillit e luanin deputetët që kishin arritur të fitonin. 54 burra e gra transkriptonin me mimikë një përzierje të çuditshme të një gëzimi fëminor për faktin se ishin tashmë deputetë (një pjesë për herë të parë), dhe mllefit se mund të kishin bërë më shumë. Nëse partia e tyre do të kishte fituar secili prej tyre ishte në të drjetën e vet të ëndërronte si ministër potencial.

Ajo pamje, si në një procesion mortor, mbahet mend më shumë se fjalimi i Lulzim Bashës. Ai tha, pak a shumë, atë që pritej: na i vodhën zgjedhjet, regjimi Rama-Doshi etj etj.

Fjalia me të cilin mbylli fjalimin mbeti në kujtesë po aq sa pamja që Basha kishte zgjedhur për kartolinën e ‘ngushëllimit’. “Do ta çojmë betejën deri në fund”, tha Basha, me një zë ku përqendrohej ‘kërcënimi’ dhe përbetimi për opozitë të fortë kundër kryeminsitrit Rama dhe të tijve.

Fraza u përmbys në parodi, sa në memet e rrjeteve sociale aq edhe në studiot e emisioneve televizive të mbrëmjes. Ylli Rakipi, Arian Çani, Artur Zheji, Edvin Kulluri dhe Arian Curi, në emisionin ‘Të paekspozuarit’, duke ndjekur klipin ku Basha përbetohej për ‘betejën deri në fund’, prodhuan, ndoshta, episodin televiziv më spektakolar të tranzicionit. Duke mos mundur të mbanin të qeshurat, drejtuesi u detyrua të fuste reklamë.

Çuditërisht, Lulzim Basha nuk vonin për t’u takuar me parodinë që luhet mbi personazhin e tij. Gazetarët e Politiko kanë hulumtuar aktivitetin e kryetarit të opozitës në Facebook, që nga 26 prilli, pra një ditë pas humbjes në zgjedhje dhe fjalimit famëkeq, deri në fund të verës, më 29 gusht.

Të dhënat janë aty, por jo gjurmët e ‘betejës’ së kryetarit të PD, i cili u rikonfirmua për herë të tretë në detyrë në mes të qershorit. Në 124 ditë që shtrihen mes dy datave të analizuara Basha (apo ekipi i tij) kanë hedhur 124 statuse, pra mesatarisht 1 në ditë (ka ditë të tëra pas asnjë reagim, siç ka edhe ditë -ato gjatë fushatës së brendshme-me 4,5 statuse). Ndër ta, thelën e luanit, 90 të tilla, e zënë statuset për aktivitetet e Bashës që kanë të bëjnë me fushatën për kryetar të PD. ‘Shqetësimi’ i dytë për shefin e rikonfirmuar të PD janë statuset për festat fetare apo civile, apo urimet për personazhe dhe aktivitete të ndryshme, 15 të tilla. Pesë më pak, pra 10 statuse, kanë të bëjnë me ngushëllime vdekjesh apo mesazhe përkujtimore.

Të fundit, 9 statuse ose deklarata në Faceboook shqetësohen me ‘qeverinë Rama’ dhe aktivitetet e saj. Basha ka konsumuar një ‘fishek më pak’ në betejën që ‘do ta çonte deri në fund’ për kundërshtarin politik i cili, sipas tij i vodhi zgjedhjet (për të dytën herë), se sa për ngushëllimet për vdekjet e personazheve partiakë, apo, deri edhe te babai i ndjerë i ish-kryeparlamentarit të Kosovës, Kadri Veseli. Por, edhe në parodi ka shpresë. Sepse, më 10 shtator, pra pas tri ditësh, fillon punimet Kuvendi i Shqipërisë dhe Basha me 54 palikarët e tij ndoshta e kanë lënë për ta filluar betejën mu atë ditë.

Statuset e Bashës anti-qeveri (nga data 2 korrik- 28 korrik):

Statuse me përmbajtje urimesh dhe rutinë e partisë, (nga 2 maj- 29 korrik):

Aktiviteti i kryedemokratit në Facebook si pjesë e fushatës së PD-së:

Mesazhi ngushëllimi dhe përkujtimore: