Rama i quan ‘karanxhollë’ opozitën, Berisha quan Bushatin ‘fundërrinë’

Seanca e radhës e Kuvendit u shoqërua nga debate shumë të forta.

Kryeministri Edi Rama nga ana e tij e nisi duke folur për çështjen e hapjes së negociatave.

Rama tha se negociatat janë hapur pa asnjë kusht.

Ai akuzoi opozitën se po rropatet të pengojë sërish procesin e vetingut, edhe pasi Komisioni i Venecias të japë qëndrimin e saj.

“KE rekomandoi hapjen e negociatave për anëtarësim të Shqipërisë në BE me mirëkuptimin që të nisë zbatimi i vetingut. Nëse këtë do ta quajmë kusht apo kushtëzim, është kushtëzim që nuk lidhet me këtë qeveri, por me këta, sepse ligjin e vetingut e kanë bllokuar këta, e kanë çuar këta në Gjykatë Kushtetuese për ta shpallur antikushtetues dhe po rropaten ditë natë për të marrë masa që sido që të vijë puna, edhe pasi Komisioni i Venecias të japë vlerësimin, përsëri ta rrëzojë. Unë jam gati ta quajmë kusht, por kusht i përbashkët, edhe pse ne jemi 100% në mbështetje të ligjit dhe jemi 100% të gatshëm të fillojë procesin e zbatimit të tij”.

Gjatë fjalës së tij Rama iu drejtua opozitës duke e etiketuar si ‘turmë, tufë, të pagdhendur, karanxhollë’ që çoi në acarimin e deputetëve të opozitës, fillimisht duke folur nga vendi dhe pastaj duke iu afruar pranë foltores.

Në një moment garda u afrua për të parandaluar çdo tensionim.

Më pas Rama foli për fitoren e Donald Trump në zgjedhjet amerikane.

“Nuk është hera e parë që mblidhet një tufë prej atyre karanxhollëve të pagdhendur se pse flas si kryeministër i Shqipërisë në arenën ndërkombëtare. Unë flas për Kosovën në Serbi, karangjollët më hidhen në fyt. Flas për ligjin e luftës me Greqinë, çfarë nuk thonë”.

“Lëshohen në banaqe e portale të më kryqëzojnë mua në emër të besnikërisë ndaj Trump, sikur janë çunat e lagjes që sapo u doli vëllai i madh nga burgu e thonë ‘tani do e shihni ça do bëjmë’.”

“Unë flas për një kandidat duke shprehur kundërshti për deklaratat e tij për Kosovën, myslimanët dhe emigrantët. U jam kundërvënë atyre fjalëve dje me bindje dhe me shumë bindje sot dëshiroj suksesin e presidentit të ri të SHBA”.

Në fjalën e tij, deputeti demokrat Sali Berisha e quajti Ramën “kufomë e pakallur”, “njeriu me kokë në tepsi”.

Berisha tha se hapja pa kusht e negociatave ishte zotimi i opozitës.

“Unë e kuptova hallin e tij se e ka kokën në tepsi nga ky raport, i cili në çdo rresht, kapitull i thotë se me ty nuk ka negociata, se negociatat do i hapë opozita”.

Rama nuk ndodhej në Kuvend kur po fliste Berisha.

Berisha tha se edhe përsa i përket Trump, ai nuk ka folur kundër Kosovës, pasi ky ka qenë një lajm i mediave serbe, i përgënjeshtruar nga Trump.

“Ky vetëm për prapanicën e tij e ka, se e ka kokën në tepsi,” tha Berisha për Ramën.

Duke folur për vizitat e Ramës në Serbi, Berisha tha se ai ka shitur Kosovën tek Beogradi.

“I keni futur thikën për llogari të një pale të tretë Kosovës, për llogari të Beogradit”.

Pas reagimit të ministrit të Jashtëm, Ditmir Bushati, që deklaroi se ‘Berishën nuk e merr kush seriozisht’, Berisha iu kthye duke e quajtur “fundërrinë”.

“Në qoftë se rrugeçër të rritur nga kodoshër, sillen në këtë mënyrë, kjo është një gjë shumë e rëndë. Jam Sali Berisha unë o budallenj, o çakenj,” tha Berisha.