5 qytetet europiane që duhen vizituar në pranverë

Me hyrjen e pranverës, edhe kontinenti europian bëhet më tërheqës sesa gjatë periudhave të tjera. Të pasura me një arkitekturë karakteristike, një kulinari të shumëllojshme dhe mbi të gjitha tradicionale, një pasuri shekullore artistike dhe muzikore, ky kontinent, për kënaqësinë e shumë turistëve, hap disa nga dyert e qyteteve të tij më të bukura, si:

Amsterdami, Holandë

Holanda krenohet në pranverë me kopshtet e saj me tulipanë. Keukenhof Gardens, një prej më të famshmëve, i cili ndodhet në afërsi të qytetit Lisse, është një mrekulli më vete. Gjatë pranverës ju mund të shijoni të gjithë qytetin duke e vizituar atë me biçikleta që jepen me qira në qendër të tij duke mos humbur asnjë vend.

Lisbona, Portugali

Në pranverë, Lisbona është një prej qyteteve më të vizituara të Europës Perëndimore. Klima e ngrohtë, rrugicat piktoreske dhe shumë vende të tjera karakteristike të saj, krijojnë tablonë perfekte të një udhëtimi ideal. Kështjella e qytetit dhe Sintra dhe Cascais, nuk duhen lënë kurrsesi pa u vizituar.

Budapest, Hungari

Kryeqyteti hungarez, Budapesti, renditet si një prej vendeve më të vizituara gjatë muajve mars-maj dhe mbi të gjitha, si një prej vendeve turistike ku ju mund të shpenzoni një buxhet minimalist. Në këtë qytet ndërthuren në harmoni njëri me tjetrin qyteti antik i Budës me pjesën e re Pestin. Ideale në pranverë janë mbi të gjitha edhe banjot termale.

Riga, Letoni

Kyeqyteti i Letonisë, Riga është sinonim i muzikës klasike, elegancës dhe i arkitekturës historike. Lëreni veten të deheni nga mëngjeset pranverore dhe mos humbisni kurrsesi qendrën e qytetit antik. Riga është vlerësuar në 2014, si kryeqyteti europian i kulturës.

Kopenhagen, Danimarkë

Edhe Danimarka është një atraksion më vete sidomos gjatë pranverës. Fillojeni vizitën tuaj me sheshin Kongens Nytorv, pastaj me teatrot e mrekullueshëm si Teatri Mbretëror Danez dhe vazhdoni më tej me rrugën e mbushur me dyqane në Stroget. Mbrëmjet mund t’i kaloni në Blue Planet apo në njërin prej akuariumeve më të mëdhenj të së gjithë Europës.