Kush nuk e ka një foto pazari nga të gjithë ata që kanë vizituar qoftë edhe një qytet jashtë Shqipërisë? Po nuk e pate, zëre se nuk ka dalë hiç “jashtë shtetit”. Dyqanet e vockla ku shiten çingërrima, birraritë me muzikë live, kafenetë në shesh, ëmbëltoret dhe stendat e fruta perimeve janë po aq tërheqëse sa edhe butikët me xhama fafuritës të çdo qyteti që mund të keni vizituar e që tani mund t’i gjeni edhe në kryeqytet. Zona e Pazarit të Ri është destinacioni më “in” i Tiranës dhe të bësh foto aty është moda më e re. Aq sa po eklipson edhe ish-Bllokun e famshëm. Ngaqë Pazarin e Ri mund ta shfrytëzosh për aq shumë gjëra. Për shembull:

Për të promovuar jetën e shëndetshme
Nga e cila Landi Hysa nuk ka ndër mend të heqë dorë dhe e këshillon me aq forcë. Fotoja e radhës në Instagramin e tij, i ka të gjitha në një: frutat dhe perimet e freskëta, biçikletën dhe sigurisht Landin, që është shembulli i përkryer i jetës së gjelbër.

Për të gjetur objekte të vjetra e të veçanta
Si Rea Xhillari, vajza e Linda Ramës, që ka shfrytëzuar paraditen me diell për të bërë një shëtitje në tezgat e Pazarit të Ri, ku mund të gjesh objekte të veçanta dhe origjinale për veten e shtëpinë, pa shpenzuar shumë para.

Për të bërë foto fashion
Syrit të një blogereje si Marigona Nila nuk i shpëton një stendë mbushur plot me perime të freskëta me ngjyra. Jo vetëm për t’i blerë. Por edhe për t’i shfrytëzuar për foto. Siç kanë bërë para saj firma të mëdha si Moschino e Dolce & Gabbana: të pozosh pranë frutave e perimeve është fashion dhe pikë.

Për të lënë një takim
Me miqtë ose me partnerin ose me të dy palët bashkë. Si Joleza Koka, që pikëtakimin e radhës me grupin e miqve dhe me të dashurin e ka lënë pikërisht në zonën e Pazarit të Ri. Aty ka kafene të lezetshme ku biseda shijon si jo më mirë.

Për të realizuar shkrimin e radhës
Blogi i Anjeza Majës ka pikërisht këtë mision: të na bëhet guidë në destinacione të reja, kur mund të gjesh pjata të veçanta e të shijosh gatime të reja. Restorantet e rinj të Pazarit të Ri ishin propozimi i radhës i Anjezës.

Për të bërë një shëtitje
Është kulm pranvere. Kur më shumë se tani mbrëmjet shijojnë më shumë? E kur më shumë se tani mund të shijosh bisedat pas punës me partnerin, në një cep të qetë e të këndshëm? Erion Veliaj dhe Ajola Xoxa kanë bërë ekzakt të njëjtën gjë, para se të mbrëmja e vonë t’i gjejë në shtëpi.

Për te realizuar shërbimin fotografik të radhës
Sidomos fotografët janë në gjuajtje në vendeve të reja dhe sfondeve të veçanta për të realizuar shërbimet fotografike. Fotografi Fani Aliko e ka gjetur cepin që e ka frymëzuar dhe është i qetë se fotot e radhës do dalin si jo më mirë.

Për të kënduar
Meqë në Pazarin e Ri po organizohen gjithnjë e më shumë aktivitete, ky është edhe destinacioni i ri i këngëtarëve. Venera Lumani është duke kënduar live dhe duke shijuar publikun në zonën më të re të Tiranës.

Për të shfrytëzuar sfondin
Sepse kështu fotot dalin edhe më të bukura. Dhe fashionista Stela Plaka, që është përherë në gjuajtje të cepave të bukur foto, sapo e ka gjetur një, së bashku me mikeshën e saj.