10 lloje njerëzish acarues

Njerëzit super-bio

Si t’i dalloni: Janë ata që përdorin shpesh fjali të tipit: “Na e shpifët me gjithë këtë make up, bëhuni natyrale një herë në jetë.”

Pse na acarojnë: Sepse janë shumë sipërfaqësorë dhe vdesin t’i kategorizojnë të tjerët, veçanërisht gratë, në dy lloje: Ato që nuk lyhen, që janë të zgjuara, punëtore, me të gjitha të mirat, dhe ato që lyhen, pra “pjeshkat”, që sipas tyre, dinë vetëm të lyhen dhe s’mund të bëjnë asgjë tjetër në jetë.

Pse duhet të shpallen Non Grata: Sepse këta njerëz janë ata që nxisin paragjykimin dhe diskriminimin, duke i gjykuar njerëzit vetëm nga pamja e jashtme. Janë më të cekët se “pjeshkat” që vdesin të gjykojnë.

Njerëzit të cilëve nuk u hahet kurrë

Si t’i dalloni: Janë ata që nuk porosisin kurrë për të ngrënë, por mbarojnë gjysmën e racionit tënd.

Pse na acarojnë: Përveç faktit që po na bëjnë kockë e lëkurë (kjo edhe na pëlqen ndonjëherë), na lodhën duke u shpjeguar se sufllaqja të shëndosh, edhe nëse është e tjetrit.

Pse duhet të shpallen Non Grata: Sepse më ka marrë malli të porosis një picë dhe ta ha të tërën vetë!

Njerëzit që kërkojnë mami për lidhje sekrete

Si t’i dalloni: Kërkojnë mami për lidhje sekrete

Pse na acarojnë: Sepse kërkojnë mami për lidhje sekrete

Pse duhet të shpallen Non Grata: Sepse kërkojnë mami për lidhje sekrete, ndërkohë jetojnë akoma me mamin dhe s’marrin as mundimin për të rregulluar krevatin në mëngjes, lëre pastaj t’u hyjnë edhe halleve të familjeve të të tjerëve.

Njerëzit që kanë filluar palestrën me vonesë

Si t’i dallojmë: Janë zakonisht mbi të 30-at, kanë dy javë që kanë filluar palestrën dhe në çdo bisedë flasin si Blerina Bombaj, madje janë të gatshëm t’i japin këshilla edhe Klodiana Shalës.

Pse na acarojnë: Sepse edhe në mes të një diskutimi për pasojat që la Traktati i fshehtë i Londrës tek kufijtë e Shqipërisë, ata do të thonë se fajin e kishte dieta e Mussolini-t.

Pse duhet të shpallen Non Grata: Sepse të bëjnë të ndihesh keq me veten kur të përsërisin vazhdimisht se “duhet të bësh palestër” dhe nuk ka asgjë interesante të dëgjosh sesi jeta e ndryshoi brenda dy javëve dhe tani kanë arritur më në fund paqen shpirtërore.

Vajzat anti-firmato

Si t’i dallojmë: Ndihen si gueriljet e Che Guevara-s dhe shprehin vazhdimisht urrejtjen e tyre për çantat Guçi dhe Louis Vuitton dhe fustanin Valentino që ka komshia ngjitur. Përdorin shpesh shprehjet: “Unë nuk i blej se janë firmato, unë i blej se më pëlqejnë.”, apo: “Njerëzit budallenj shkojnë pas modës, unë vesh vetëm çfarë më pëlqen dhe më shkon.”

Pse na acarojnë: Sepse këto i përsërisin sa herë ty të kanë bërë dhuratë një çantë që e kishe fiksim.

Pse duhet të shpallen Non Grata: Sepse një ditë të bukur i shikon duke ecur tërë sharm nëpër rrugë me çantën e re Chanel që ua kanë sjellë nga jashtë.

Njerëzit që s’kanë asnjëherë të vogla

Si t’i dallojmë: Janë vazhdimisht dëshpërimisht në kërkim të “të hollave” sepse kanë gjithmonë 50 mijë lekëshe me vete dhe nuk kanë ku ta thyejnë.

Pse na acarojnë: Sepse përveç të hollave, nuk kanë asgjë bazike për nevojat jetësore: “A ke një facoletë? A ke një cigare? A të pi pak nga Red Bull-i yt? A ke një lines?”. Dhe ti pret që një ditë të mbetesh pa mbathje.

Pse duhet të shpallen Non Grata: Sepse është një mënyrë për të jetuar në kurriz të të tjerëve.

Njerëzit që kanë gjithmonë një mënyrë, vend, alternativë më të mirë

Si t’i dallojmë: Ti je shumë i/ e lumtur me telefonin tënd të ri, ai/ajo të thotë: “800 mijë lekë?! Ta ka fut! Di unë një vend ku e gjen me 799.999 mijë lekë!” Ose kur ke blerë një parfum të ri, që më në fund e ndien në të gjithë dhomën, të thotë: “100 mijë lekë parfum Narcizio Rodriguez?! Unë e marr 8 mijë lekë të vjetra me mbushje!”

Pse na acarojnë: Sepse të prishin qejfin për çdo gjë!

Pse duhet të shpallen Non Grata: Sepse mendojnë se i dinë të gjitha dhe përpiqen të të bëjnë të ndihesh budalla. Janë përgjithësisht të mbushur me negativitet ose, siç quhen tani “psikovampirë”.

Njerëzit ‘notification’

Si t’i dallojmë: Janë ata që i shohin njoftimet në telefonin tënd përpara teje (Këtu përfshihen edhe të dashurit tanë).

Pse na acarojnë: Sepse kur je ulur me një të tillë në kafe dhe të vjen një mesazh në telefon, e ka për detyrë të zgjasë kokën ta lexojë.

Pse duhet të shpallen Non Grata: Cënim i rëndë i privatësisë!!

Njerëzit anti-pop

Si t’i dallojmë: Kur është Rihanna në sfond dhe ti kërcen, ata e kanë zakon të pyesin: “Kush është kjo këngëtare?!”

Pse na acarojnë: Janë ata që zgjohen në Vienë, hanë drekë në Alpet e Zvicrës kurse në darkë shkojnë tek “Tulla”. Gjatë kësaj kohe, nuk paskërkan shkelur në asnjë lokal, nuk kanë takuar asnjë të afërm që dëgjon Noizy-n dhe nuk kanë kaluar në asnjë rrugë ku ia ka shkelur gazit një makinë me Ledrin në kupë të qiellit.

Pse duhet të shpallen Non Grata: Sepse edhe këta e kanë për zakon t’i kategorizojnë njerëzit: Ata që flasin për Mozart-in, librat dhe nuk janë në rrjetet sociale “bëjnë”, kurse ata që janë aktivë në jetën shoqërore, që e njohin Noizy-n dhe Kim Kardashian-in (edhe pse mund të njohin shumë mirë edhe Franz Kafkën) s’bëjnë dy lekë. Shkurt, ndihen superiorë.

Njerëzit Jezu Krisht

Si t’i dallojmë: Janë ata që nuk mërziten kurrë, nuk acarohen kurrë me askënd, nuk kanë kurrë një fjalë të keqe për të thënë dhe e kanë për zakon të thonë: “Hë se nuk është e keqe filanja, kushedi si jeni keqkuptuar”.

Pse na acarojnë: Sepse sa herë ty është bërë një padrejtësi nga dikush që njihni të dy dhe ai qëndron neutral, të duket sikur po flet me murin, madje ndihesh edhe në faj.

Pse duhet të shpallen Non Grata: Sepse ti e kupton se ata kanë gjykimet e tyre për këdo, por përpiqen ta mbajnë mirë me të gjithë. Është hipokrizi./Anabel.al