PAS HESHTJES SË GJATË, ALFRED LELA PËRPLASET SËRISH ME HENRI ÇILIN, SULMON GAZETARËT E MAPO-S

“Henri Çili mirë se erdhe te linja ime editoriale”, e titullon artikullin e tij Lela ndërsa duket se nuk ka shumë konsideratë edhe për gazetarët e MAPO-s duke i cilësuar si “dytësat” e Henri Çilit.

“MAPO, e botuar prej tij, vazhdoi e palëkundur mbështetjen për qeverinë, duke mos harruar as diversionet ndaj opozitës, nëpërmjet tezash që janë të Çilit, por shkruhen nga dytësat e tij në gazetë, djem apo burra, që nuk mund të konsiderohen budallenj, por që njohjen e politikës së Tiranës e kanë laboratorike. Kjo (mos)njohje, gërshetuar me tezat e Çilit, të cilat duke qenë se synojnë më shumë të jenë shpore intelektuale se sa argumente editorialesh, prodhojnë atë që shohim përditë në faqet Op Ed të MAPO, një shtërzim mes intelektualizmit të kullës uetase, pragmatizmit tregtar dhe ngutit provokues”, shkruan ndër të tjera Lela në artikullin e publikuar në Politiko.al.

“Çka është më e rëndësishme, kthesa e Çilit, e lexuar qartë në numrat e fundit të MAPO, jep një shenjë tjetër pozitive. Mbështetësit më të zëshëm të Kryeministrit e kanë humbur besimin te politikat e tij ‘reformatore dhe po e braktisin.

Nuk është e nevojshmë që Çili të dalë kundër shkrimit të vet, sepse kanë qenë shkrimet që i kanë dalë kundra. Nuk i kërkohet as të bëjë një anti-editorial ku ta dekonstruktojë Ramën si ‘reformator të madh. Me betejë të fituar, por luftë të humbur, nuk është në nderin e triumfatorëve që të parashtrojnë kushte të tilla meskine

Kjo nuk ia pret hovin dëshirës së një urimi me tingëllima cinizmi: Henri Çili, mirë se erdhe te linja ime editoriale!”, përmbyll Lela.