Kur çdo gjë është dhënë me koncesion, përse na duhet qeveria?!

Pa fund koncesione,
shteti nënshkruan,
dhe s’e pyet fare,
atë që paguan!

Jo veç ne të gjallëve,
shtatë lëkurë na rrjep,
po dhe ç’vinë pas nesh,
s’u lë gjë në xhep!

Me pak llogari,
edhe jam i bindur,
sa ka hyrë në borxhe,
edhe kush s’ka lindur!

Edhe kur vjen koha,
t’i marri fitim,
shteti-prapë pa pyetur,
koncesionet shtyn!

Ndaj dhe qeveria,
është kot-fare kot,
kur asnjë qindarkë,
s’ka marrë gjer më sot!

Një gjë e kam thënë,
sot e nga fillimi,
koncesionet janë,
një lloj skllavërimi!

Gjersa çdo biznes,
është me koncesion,
këtu-qeveria,
kot që ekziston?!

Gjersa koncesioni,
mbulon koncesionin,
dy-tri ministri,
këtu do mjaftonin!

Se pas koncesionit,
ti s’ke gjë në dorë,
kur dhe çdo kontratë,
është në disfavor!

Kemi Aeroportin,
që na bëri gropën,
se është më i shtrenjti,
në gjithë Europën!

Ndërsa PPP-të,
që bëjnë këta,
janë ato që quhen:
“Krime të mëdha!”

Ato realisht,
janë super kredi,
që me disa fish,
do paguash ti!

Sot je fort “i lumtur”,
se s’nxjerr gjë nga xhepi,
po brisku i tyre,
gjithnjë do na rrjepi!

E rritja e tyre,
kurrë s’do të ndalet,
do ta shtypi vendin,
si Piramidalet!

Pisllëk pa provuar,
këtu nuk na mbeti,
dhe gjithnjë e ha,
populli-jo shteti!

Shteti në çdo vjedhje,
është bashkëpunëtor,
populli voton,
por s’ka gjë në dorë!

Por edhe kur flet,
s’e dëgjon njeri,
është kali i karrocës,
në çdo qeveri!

Dhe pse në liri,
jemi të pushtuar,
se jemi një vend,
i kolonializuar!

A.DUKA