Pedagogu

Pedagodu – nga Bilbil Beqiri / Podiumi.com

Pedagogë ka universiteti shumë, por unë dua të flas pak për njërin prej tyre. Pedagogu që dua të flas unë për të është shtat shkurtër,  por mos u shqetësoni sepse ai i ka marrë masat për këtë. Ai i mban flokët lart me xhel tërë kohës, kështu që në këtë mënyrë i fiton disa centimetra gjatësi. Këpucët i ka me gome të trashë, ja ku u bënë edhe disa centimetra të tjerë nga poshtë që e ndihmojnë pedagogun të duket më i gjatë. Kryesisht vesh kostum por jo gjithmonë kravatë. Cigare nuk e kanë parë ndonjëherë të ketë tymosur.

Në orën e tij të mësimit është shumë i rreptë, vetëm lexon nga fletorja e vet, dhe nuk lejon askënd të bëjë pyetje, arsyeja vetkuptohet, ai ka frikë se mos pyetjet i vijnë të vështira dhe nuk do mund t’u përgjigjet dot.

Bën sikur i ka për zemër  studentët e shkëlqyer por në fakt e kundërta është e vërtetë, ai nuk i do aspak ata, sidomos shikimet e tyre skeptike kur ai përpiqet të shpjegojë ( lexojë )  temën e ditës. Ai më tepër do studentët e painteresuar dhe të pavëmendshëm. Në një kafe të relaksuar dhe konfidenciale pedagogu mësohet ta ketë thënë vetë me gojën e tij këtë gjë.

– Nuk i duroj dot ata të rreshtit të parë. Sesi më shikojnë ! Pastaj, vitet kalojnë shpejt, ata do vijne të ma zënë vendin dhe jo këta që vetëm një copë pesë duan

Makinat i ndërron shpesh, jo sepse është shumë i pasur por sepse merret me tregti makinash. E ka më tepër punë të dytë. Makinat ua shet studentëve që kanë mundësi ekonomike. Ndërsa studentët ia blejnë jo se duan makinat e tij të vjetra, por sepse duan ta kenë mirë me të. Sa të kalojnë lumin…

Në fakt nga kjo puna e shitjes së makinave nuk është shumë i lumtur. Se e marrtë e mira edhe studentët nuk është se janë shumë të mirë për mbajtje sekretesh. Por pedagogu është duke shitur makina përkohësisht, derisa të bëjë edhe ai librin e vet si të tjerët, sepse pastaj do fillojë edhe ai t’u shesë studentëve edhe ai librin e vet me detyrim të nënkuptuar.

Njëherë i duheshin lekë borxh dhe si “kolateral’ për kthimin e lekëve kishte sezonin e provimeve që po afronte. – Sa të vijë sezoni i provimeve do t’i kthej lekët, – mësohet t’i ketë dhene garanci huadhënësit.

Kur ka komision për mbrojtje diplomash është i pari që shfaqet. Eshtë dita më e lumtur e tij, është dita e hakmarrjes për të. Si një Chihuahua – intermezzo- ( zërin e ka të hollë )

 kërcënon me pyetje kandidatët, që bëjnë sikur e respektojnë sepse duan të kalojnë “lumin”.

Tani ju doni ndoshta të dini se kush është pedagogu, në cilin universitet punon apo se çfarë lënde jep. Këtë nuk jua them, shikoni pedagogun tuaj