Rama “do thyhet në mes” në zgjedhjet e 25 prillit

Nga ndryshimet për Kodin Zgjedhor te zgjedhjet brenda partisë- deklaratat kryesore të Kryemadhit

Kryetarja e Lëvizjes Socialiste për Integrim, Monika Kryemadhi, në një lidhje direkte në emisionin “Çim Peka Live” komentoi votimin e mazhorancës për Kodin Zgjedhor, ku nuk hapi 100% listat zgjedhore dhe bllokoi koalicionet partiake, si edhe foli për zgjedhjet brenda partisë që drejton dhe deklaratat e Presidentit të Republikës, Ilir Meta.

Për Kryemadhin, opozitën e bashkuar nuk do e ndalin as heqja e koalicioneve dhe as mos-hapja e listave për të fituar.

Sipas saj, Rama “do thyhet në mes” në zgjedhjet e 25 prillit pasi sipas saj i ka të gjithë opozitë.

“Edi Rama edhe administratën e ka në opozitën. Edhe policët i ka në opozitë. Edhe socialistët i ka në opozitë.  Vetëm 1 përqind e oligarkëve janë me Ramën. Sot për hir të së vërtetës ka një Edi Ramë që po e shikojmë lakuriq edhe nga ana politike. Opozita do hyjë në zgjedhje dhe do i fitojë ato në mënyrë të bindshme. Nuk do fitojë opozita por do fitojnë shqiptarët më shumë se sa listat e stërzgjatuara të Ramës. Ne e dinim shumë mirë që edhe po të hynim në Këshill Politik, integrimi nuk do të hapej. Sepse krimi i organizuar, dosjet nuk ishin në dorë tonë Dhe ne bëmë qokë ndaj ndërkombëtarëve. Ne do shkojmë në zgjedhje dhe do ta thyejmë në mes Edi Ramën dhe çfarë ka nga pas”-deklaroi Kryemadhi.

Lidhur me koalicionet, Kryemadhi theksoi se nuk ka rëndësi nëse Rama i ndaloi në Kodin Zgjedhor pasi sipas saj PD-ja dhe LSI-ja kanë firmosur një marrëveshje dhe nuk e ndryshojnë.

“Çështja e koalicionit nuk është çështje letrash, por fryme. Kush është fryma? Fryma është që nuk firmos në letër ti kundër Edi Ramës. Strategjia e opozitës është strategjia për ti dhënë dërmën Partinë Socialiste. Fjalimi i Edi Ramës e kishte të gjithë hallin te Meta. Jo 1 përqind por edhe 0,5 përqind ta bën Edi Rama pragun, nuk i bën dot mandate për të bërë shumicën. Kodi Zgjedhor nuk mbush dot xhepat e shqiptarëve. Problemi ynë kryesorë është çfarë do bëjë opozita kur të marrë pushtetin. Historia që ne po flasim është që Edi Rama po kërkon të hyjmë në vorbullën tonë. Unë nuk kam më problem Kodin Zgjedhor. Unë kam nënshkruar një marrëveshje me Bashën me 23 prill. Sot Rama ka nënshkruar fundin e tij”-deklaroi kryetarja e LSI-së.

Më tej Kryemadhi foli edhe për zgjedhjet brenda partisë, duke konfirmuar edhe ardhjen më të re të ish-drejtoreshës së tatimeve të qeverisë Rama, ku Brisejda Shehaj do mbajë edhe postin e nënkryetares së LSI-së në Tiranë.

“Briseida Shehaj do jetë nënkryetare e LSI-së në Tiranë. Brisejda Shehaj, e kam bërë unë anëtare të Partisë Socialiste, më saktë të FRESSH-it që në vitin 2001. Shehaj është rekrutuar siç është rekrutuar Ridvan Bode dhe Ilir Rusmajlaj në Partinë Socialiste”-tha Kryemadhi.

Kryemadhi shtoi se LSI-ja do ketë votime në parti më 21 nëntor ku do zgjedhë strukturat drejtuese sipas parimit një anëtar një votë.

“Ne kemi një strategji. Më 21 nëntor kemi votimet në parti ku do zgjedhim ‘një anëtar një votë. Ne kemi qenë të parët që kemi bërë vettingun për deputetë, me dëshmi penalitet dhe me radhë. Pra përsa i përket demokracisë brenda partisë, LSI është avangardë”-tha kryetarja e LSI-së.

Kryemadhi, u pyet edhe për lëvizjet dhe deklaratat e Presidentit të Republikës Ilir Meta pas votimit të ndryshimeve të Kodit Zgjedhor.

Ajo tha se Presidenti e ka detyrë kushtetuese të dalë nëpër sheshe, duke kujtuar edhe tubimin e 2 marsit të mbledhur nga Meta në mbrojtje të Kushtetutës.

“Po pyete Ilir Metën vetë. Po e mbani mend 2 marsin? Për 11 ditë e bllokoi të gjithë Tiranën. Presidenti është garant i Kushtetutës dhe rojtar i saj. Opozita pastaj ka strategjinë e saj për të maksimizuar votën. Presidenti e ka detyrë kushtetuese, të dalë nëpër sheshe, shkolla, komisariate policie, për ti dhënë virtytin që u duhet administratës publike. Unë po ju them vetëm kaq që një javë përpara zgjedhjeve edhe shushunjat do ta lenë Ramën që po pinë gjak në trupin e tij”-tha Kryemadhi.