Ish-deputetja e Partisë Demokratike, Jorida Tabaku ditën e sotme është ndalur në një takim me biznesin e vogël në kryeqytet.

Ajo thotë se qeveria është treguar hileqare me biznesin e vogël duke i rritur tarifat vendore dhe çmimin e energjisë elektrike.

Sipas saj biznesit i janë shtuar kostot edhe me vendosjen e kontabilistit duke paguar 600 mijë lekë ndërsa pritet ti shtohet edhe kostoja e fiskalizimit prej 2 mijë euro.

“Qeveria është treguar hileqare dhe e pabesë ndaj biznesit të vogël, i vendosi ato në skemën e TVSH dhe që prej qershorit 2015 ku Veliaj u bë kryetar bashkie taksat dhe tarifat vendore u rritën. Një biznes i vogël sot paguan çmimin e lartë të energjisë elektrike, i është shtuar një kosto për kontabilistin prej 600 mijë lekësh, po i shtohet kostoja e fiskalizimit prej 2000 eurosh dhe i janë rritur të gjitha taksat dhe tarifat vendore”-shkruan Tabaku.

Sipas Tabakut bizneset e vogla paguajnë deri në 13750 lekë taksa dhe tarifa vendore.

“Një biznes që sot ka xhiro deri në 2 mln lekë sot paguan deri në 13.750 lekë taksa dhe tarifa vendore ndërkohë që bizneset me xhiro 2 mln deri në 8 mln lekë paguajnë deri në 49.500 lekë taksa dhe tarifa vendore në bashkinë Tiranë pa folur për bizneset deri në 14 mln lekë që paguajnë deri në 372 mijë lekë taksa dhe tarifa vendore përpos taksave të qeverisë qendrore”-shkruan Tabaku.

Më tej ish-deputetja tregon edhe planin e PD-së për taksat e biznesit të vogël ku sipas saj me taksën e sheshtë 0.5% të xhiros vjetore do sjellë zhvillim për subjektet.

“Kjo është e vërteta dhe nuk ka propagande dhe bojatisje qe e mbulon. Si në qendër të Tiranës dhe në periferi situata është e njëjtë, qeveria me një tufe taksidarësh sulet për të marrë nga biznesi vogël atë që ia fal miqve e oligarkëve. Biznese në kulm të dëshpërimit që nuk mbulojnë dot kostot mujore, që nuk paguajnë dot qiranë që përditë janë objekt sulmi të taksidarëve e që vetëm një kontakt kanë me shtetin atëherë kur i vendos gjoba.

Biznesi vogël duhet të jetë shtylla e zhvillimit, duhet të mbështetet e jo të sulmohet, dhe nuk ka asnjë premtim elektoral qe e zhbën koston që Rama dhe Veliaj kanë sjellë në kurrizin e tyre!
PD do të vendosë BV në qendër të zhvillimit, do të vendosë një taksë të vetme unike për mbi 100 000 biznese prej 0,5%. Taksat e jashtëzakonshme, një vjedhje e pastër e bashkisë do t’i heqim për të çliruar biznesin dhe qytetarët. Askush nuk ka përse paguan për luksin e kryebetonierit të Tiranës.
Tanimë është e kuptueshme që tentativat e Ramës duke zeruar taksat janë gënjeshtra me të cilat ai do të mbulojë veprimet e tij djallëzore ndaj biznesit të vogël. Shqiptarët e dinë. Shumica e heshtur punëtore e këtij vendi e di se sa shumë ka vuajtur nga sjellja e tij në qeveri dhe kopjes në bashki. Çështje ditësh dhe javësh që ato të ndahen një herë e mirë nga e keqja e vetme e vendit”-shkruan ajo.