Dominimi i Bundesligës në Europë

Studimi i fundit i Football Benchmark i KPMG merr në analizë tregun e “naming rights” (të drejtat e emrit) në objektet sportive. Marrëveshjet për të drejtat e emrit të stadiumit konsiderohen burimi i tretë i të ardhurave më fitimprurës për klubet në fushën e marrëveshjeve komerciale, pas marrëveshjeve të sponsorizimit të fanellave dhe marrëveshjet me sponsorët teknikë që prodhojnë veshjet.

Monetarizimi i të drejtave të emërtimit të stadiumeve është një tendencë në rritje në nivel botëror, e cila i sjell të ardhura shtesë klubit. Kjo tendencë ka lindur në Shtetet e Bashkuara të Amerikës, ku tashmë është shumë e zakontë për impiantet sportive. Marrëveshja e parë u nënshkrua në Boston, më shumë se 100 vite më parë. Hapja e Fenway Park në vitin 1912, seli e ekipit të bejsbollit të Boston Red Sox përfshiu Fenway Realty Company, shoqërinë e pasurive të patundshme të pronarit të stadiumit, i cili e kapitalizoi mbi vlerën promocionale të emërtimit në atë moment.

Në këtë pikëvështrim, tregu europian i futbollit është ende i pazhvilluar, me përjashtim të Bundesligës, stadiumet e së cilës janë të sponsorizuar në 78% të rasteve. Madje, kampionati gjerman renditet edhe para MLS – kampionati i futbollit amerikan (77%). Duke marrë në konsideratë gjithë 98 skuadrat e pesë kampionateve më të mëdha të futbollit europian, vetëm 30% e tyre ka partner për të drejtat e emrit të stadiumeve.

Vetëm një e pesta e stadiumeve është i sponsorizuar në Premier League, Serinë A dhe Ligue 1. E fundit, është La Liga spanjolle, me vetëm 15% të stadiumeve të sponsorizuara. Është interesante se Süper Lig e Turqisë dhe Championship kanë më shumë objekte sportive me një sponsor për të drejtat e emrit se kampionatet kryesore europiane, me përjashtim të atij gjerman.

Duke analizuar gjithë marrëveshjet kryesore, Etihad Airways mban marrëveshjen më të madhe individuale, me vlerë 17,1 milionë në sezon, për sponsorizimin e stadiumit të Manchester City. Në vend të dytë, grupi Wanda, që mban të drejtat e emrit të stadiumit të ri të Atletico Madrid, nëpërmjet një marrëveshje vjetore me vlerë 9,6 milionë euro. Por duhet theksuar se gjiganti i sigurimeve Allianz është sponsori që shpenzon më shumë për të drejtat e emrit. Allianz ka ndërtuar një portofol global për klubet që mbështet, duke sponsorizuar 8 stadiume në katër kontinente, ndër të cilët 6 skuadra futbolli, duke paguar një total rreth 30 milionë euro në vit për të drejta të tilla.

Duke analizuar sponsorët kryesorë në sektor, ai financiar është sektori më i përfshirë në këtë lloj sponsorizimi. Në Gjermani, tregu europian më i zhvilluar në këtë drejtim, me më shumë se një të katërtën e marrëveshjeve (28%) janë me shoqëri financiare, ndjekur nga ato të shtëpive automobilistike (21%).

Pavarësisht nga përfitimi i mundshëm financiar, shumë nga skuadrat më të mira të futbollit në Europë kanë hezituar deri më tani të shesin të drejtat e emrit të stadiumit të tyre.

Duke marrë në konsideratë se sa fitojnë Citizens nga marrëveshja me Etihad, ka të ngjarë që edhe klubet e Manchester United, Real Madrid apo Barcelona të fitojnë edhe më shumë nëse do të vendosnin të ndryshonin emrin e stadiumit për të përfshirë një sponsor. Megjithatë, Old Trafford, Camp Nou, Bernabéu, San Siro, Anfield janë marka të mirëkonsoliduara, emra të rrënjosur në psikikën e tifozëve dhe publikut në përgjithësi, dhe do të ishte e vështirë përfshirja e një emri sponsori për shkak të lidhjes historike me emrin origjinal të strukturës.

Burimi: Calcio & Finanza