Ju që po e lexoni këtë lajm mund të jeni 1 nga 105 milionë njerëzit në botë që e kanë kaluar tashmë Covid-19. Kur bëhet fjalë për vaksinat, mutacione të reja të shfaqura së fundmi apo nga rreziku i ri-infektimit, mund të keni shumë pyetje. “Ne po vazhdojmë të mësojmë nga ky vit që kaluam në pandemi”, tha Dr. Becky Smith nga SHBA duke shtuar se ka shumë pikëpyetje për ata që e kanë kaluar infektimin.

Sa rrezik është ri-infektimi?

Rreziku i ri-infektimit duket të jetë mjaft i ulët. Rreziku i ri-infektimit është i ulët në 90 ditët e para të një infeksioni Covid, por edhe pse i rrallë, rreziku ekziston. “Rreziku i ri-infektimit mbetet i ulët, por ne duhet të jemi vigjilentë me shfaqjen e varianteve të reja“, tha për CNN Dr. Antonio Crespo. Koronavirusi ka ndryshuar me kalimin e kohës, siç bëjnë të gjitha viruset, dhe përmes këtyre mutacioneve, janë shfaqur variante të virusit.

Sa kohë do të zgjasin antitrupat e mi?

Antitrupat janë proteina që trupi juaj i krijon pasi të jeni infektuar. Ato ndihmojnë për të luftuar infeksionin dhe mund t’ju mbrojnë që mos ta merrni përsëri atë sëmundje. “Ajo që dimë është se kur dikush infektohet me Covid-19, ata krijojnë antitrupa që mund të zgjasin. Së fundmi thuhet se disa nga variantet e koronavirusit mund të shmangin antitrupat dhe mund të jenë potencialisht infektivë edhe për dikë që ishte infektuar me një variant të njohur të Covid-19.”

A duhet ta marr vaksinën nëse kam kaluar Covid-19?

Zyrtarët shëndetësorë dhe mjekët inkurajojnë njerëzit që e kanë kaluar Covid-19 të vaksinohen. Provat klinike sugjerojnë se vaksinat janë të sigurta dhe i mbrojnë personat që e kanë kaluar COVID-in nga ri-infektimi.

A më duhen të dyja dozat e vaksinës?

Rekomandohet që njerëzit që e kanë kaluar COVID-in të ndjekin të njëjtin itinerar vaksinash si ata që nuk e kanë kaluar, derisa të kryhen më shumë kërkime dhe zyrtarët shëndetësorë të japin rekomandime të tjera nëse do të ketë.

A mund të jem akoma duke përjetuar efekte anësore të zgjatura nga COVID-19?

Shumë persona që e kanë kaluar Covid-19 mund të përjetojnë simptoma për javë ose muaj të tërë. “Pacientët mund të përjetojnë lodhje të vazhdueshme, dhimbje koke, vështirësi në të menduar ose përqendrim, dhimbje të kyçeve, kollë, gulçim, ethe të përhershme, ndryshime në shije dhe aromë”, – tha Smith. “Këto simptoma mund të zgjasin deri në 12 javë, por edhe shumë. Thonë se simptomat zbehen ose shkojnë e vijnë gjatë asaj kohe”.