“Akti i Arjan Salës, heroik, sublim e i pashembullt”, Eurosig-Insig e UBA Bank: 10,000 $ në ndihmë të djalit dhe familjes së tij

Eurosig-Insig e UBA Bank solidarizohen me familjen e ‘Dëshmorit të Atdheut’, Arjan Sala, i cili humbi jetën si pasojë e zjarrit të rënë në magazinën e qendrës tregtare, duke shpëtuar 22 punonjës të tjerë.

Duke ndarë dhimbjen me familjarët e të ndjerit, Presidenti i grupit Eurosig-Insig dhe UBA BANK, Kadri Morina tha se i akordon familjarëve të Arjan Salës shumën prej 10,000 dollarësh në ndihmë të djalit dhe familjes së tij.

“Akti i shefit të security në zjarrin e rënë tek Casa Italia ishte një akt heroik, sublim dhe i pashembullt, mund të themi në dekada. Arjan Sala ishte ai që shpëtoi 22 jetë njerëzish duke sakrifikuar jetën e tij dhe nuk hyri mes flakëve për familjarët e tij, por ai hyri për kolegët e punës, duke i shpëtuar ata.

Jo vetëm kaq, por ai shpëtoi 22 jetë njerëzisht duke mbrojtur edhe 22 familje pas tyre, të cilët përpos fatkeqësive dhe ngushëllimeve që mund të kishin, mund do të përballeshin më pas edhe me pasoja ekonomike.

Kështu që, në vetvete ky njeri u kthye në një policë sigurimi jete për 22 punonjësit e tij, ndaj edhe Grupi Eurosig-Insig i akordon familjarëve të Arjan Salës shumën prej 10,000 dollarësh në ndihmë të djalit dhe familjes së tij.”- u Presidenti i grupit Eurosig-Insig dhe UBA BANK, Kadri Morina.

(BalkanWeb)