Shkaktoi jo pak polemika gjuha që kryeministri Edi Rama përdori gjatë fushatës elektorale për zgjedhjet e 25 prillit. Më të rënda ishin etiketimet që ai përdori për një sërë grash të opozitës si Grida Duma, Albana Vokshi, etj.

Madje, Rama e mbrojti fort atë që kishte thënë edhe kur u pyet në studio televizive. Por, me gjuhën e Ramës nuk është dakord as bashkëshortja e tij që të paktën në publik thotë se fjalori politik nuk duhet të tejkalojë etikën.

“Për mua kalimi i kufirit etik nuk duhet të ndodhë kurrë, është përtej gjinisë, përtej politikës, profesionit dhe të gjithçkaje. Do ketë kritikën timë çdokush që do ta kalonte sado pak këtë kufi” – tha Linda Rama në një intervistë në Euronews Albania.

“Në momentin që unë kam filluar të jetoj me Edin, jam martuar me Edin në vitin 2010 dhe dihet që në atë periudhë për disa vite Edi ishte në fokus të shumë sulmeve dhe shumë akuzave të cilat në fakt, ndonjëherë merrnin dhe trajta të paimagjinueshme duke sakrifikuar, duke mos marrë parasysh as gra, as të vdekur dhe as fëmijë.

Kjo ishte klima dhe unë kisha vendosur, e dija që kisha vendosur të lidhja jetën me një njëri me vokacion shumë të qartë politik dhe ndërkohë një njeri i cili kishte pretendimin dhe ambicien për tu bërë kryeministri i Shqipërisë,” – tha Linda Rama duke e mbyllur: “ishte si një breshëri, të jetoje si në breshëri, që jo në pak raste pasohej nga një mërzi e madhe”.

“Nuk i festojmë fitoret”, këshilla e Linda Ramës për mandatin e tretë të PS-së

Aktivistja e njohur Linda Rama dhe njëherësh bashkëshortja e kryeministrit të vendit në studion e “Ilva Now” komentoi si e përjetoi fitoren e mandatit të tretë të Partisë Socialiste.

“Provon një sens lehtësie, ndjehesh më e lehtësuar dhe ndjehesh e energjizuar. Është shumë i rëndësishëm për të çuar përpara një agjendë që vetëm Edi e çon në një stacion të pakthyeshëm”, tha znj. Rama.

Përballë gazetares Ilva Tare, Rama tha se fitoret në politikë nuk i kanë festuar asnjëherë në familje.

“Nga ana tjetër, doja të thoja këtë gjë që ne asnjë fitore të Edit, se janë disa fitore, janë gjithmonë fitore në një farë mënyre, të paktën për sa kohë unë jetoj me të, ne nuk e festojmë. Asnjëherë nuk kemi festuar një fitore të zgjedhjeve të Edit, sepse fitoret e partive në zgjedhje, nuk janë si fitore në sport, që ti je në një kampionat sporti, je më i miri, fiton një kupë, kupa është aty, është e pakontestueshme, e ke për gjithë jetën dhe i gëzohesh asaj kupe. Në politikë nuk është kështu. Në politikë, një fitore është thjesht një privilegj i madh dhe një mundësi e madhe për të vijuar për të bërë punë. Dhe ndërsa ti bën gjithë këto punët në vijim, është një stres i përditshëm dhe është një konfirmim që ti e kërkon që ta marrësh çdo ditë dhe çdo ditë të punës tënde”, shtoi Rama.

Gjatë intervistës ekskluzive në Euronews Albania, znj. Rama nuk kurseu këshillat dhe sugjerimet për mënyrën se si duhet ta drejtojë Rama vendin në mandatin e tretë, ndërsa tha se Shqipëria ka nevojë për zhvillim cilësor dhe standarde të reja.

“Edi thotë që mandati i tretë s’duhet t’i ngjajë dy mandateve të para. Biem dakord për këtë dhe kur hapet ndonjë aspekt më konkret fillojmë flasim. Por ajo që do të thoja unë se si do ta organizojnë këtë mandat është çështje e Partisë Socialiste dhe e Edit. Por, ajo që do të thoja unë është që Shqipëria ka arritur në pikën që ka nevojë për zhvillim cilësor dhe për standard. Ky duhet të jetë fokusi dhe mendoj që Shqipëria nuk ka më kohë që të presë që cilësia dhe standardi të jenë kryefjala e çdolloj gjëje që i ofrohet”, theksoi ajo.