Nga Namir Lapardhaja

“I kemi mbjellë për eksperiment”, tha ministrja e Bujqësisë, Milva Ekonomi, teksa u fotografua pranë disa bimëve kanabis në një serë që është nën administrimin e Qendrës së Transferimit të Teknologjive Bujqësore (QTTB) në Lushnje.
Po normal, moj zonjë, se tokat për kanabis janë ndarë nga kjo qeveri që në kohën e Saimir Tahirit.
Sepse kjo qeveri, që ndoshta ti nuk e di fare pse bën pjesë, vetëm për çështjen e kanabisit ka qenë më e rregullta.
E ke lexuar ti raportin e përgjimeve të antimafias italiane?
E ke parë që kujdesej vetë ministri i Brendshëm që shoqëruesit e tij të kontrollonin çdo lëvizje të trafikut, deri te fikja e Radarit, që ish-kolegia jote, Mimi Kodheli, dhe pasardhësja e saj, Olta Xhaçka, e mohoni?
Madje, e mohonin deri në akuzën ndaj nesh se mos ishim të roitur që mendonim si të vërtetë akuzat e opozitës se ishin fikur radarët për të bërë trafik droge.
E vetmja që të ka mbetur është ajo tokë e pazënë që është nën administrimin e institucioneve në varësi të ministrisë.
Ndoshta ti, zonja ministre, je trembur nga trafikantët që nuk janë në dijeni për atë lloj kanabisi, dhe deklarata është për t’i qetësuar, se nuk do t’u hysh në pjesë.
Kjo qeveri ka që në vitin 2013 që bën eksperiment me jetët tona, me taksat tona, me drejtësinë, me sigurinë publike.
Kjo qeveri tashmë po aplikon mënyra që ia kanë zili edhe manipulatorët më të mëdhenj në botë për mënyrën e vjedhjes së zgjedhjeve. Dhe ne duhet të habitemi se bëkeni edhe juve pak ekspriment me kanabis.
Hiç, ore, fare. Gabim madje që jep shpjegime. Ju jeni votuar për të eksperimentuar.