Edi Rama dhe Lulzim Basha 17 Maj 2017

Gjatë seancës plenare maratonë, vijuan edhe replikat si “macja me miun” të Edi Ramës me Lulzim Bashën, një grindje që tashmë është kthyer në normalitet. 

Gjatë kësaj grindje, Edi Rama bëri të ditura për publikun, disa detaje mjaft pikante nga marrëveshja e 2017-tës, midis tij dhe Lulzim Bashës. Kryeministri deklaroi se në atë kohë, Lulzim Basha i është lutur, që kur të dilnin nga takimi, pra të shfaqeshin para kamerave, Rama të mos qeshte!  

“Kur ti thua të gjitha ato që thua, unë pavarësisht se me eksperiencën, moshën, prapë unë ai jam. Kur the, mbaja sytë përtokë, m’u kujtua pse nuk dolëm në konferencë shtypi pasi mbaruam marrëveshjen, sepse më thoshe më jep fjalën që nuk do të qeshësh kur të dalim jashtë. Se çdo gjë OK, por nuk e duroj dot humorin tënd. E vë re që edhe kur flet, edhe për vulgaritet, ti konsideron gabimisht vulgaritet një gjë që s’ka lidhje fare me vulgaritetin, por mënyrën e komunikimit me njerëzit real, po ti njeh shumë pak njerëz real. Duhet të ketë një arsye pse pastaj kur vjen puna te vota, ti merr aq sa merr dhe të jesh i sigurt që nuk është masakra zgjedhore. Mos më tërhiq në duele të pamundura për ty, mos i hy rrugës të bësh humor, se nuk di“, tha Rama.

Kujtojmë se në vitin 2017, Edi Rama dhe Lulzim Basha u mbyllën në një takim me njëri tjetrin, ku vendosën të hyjnë në një marrëveshje politike, kryesisht për të asgjësuar partitë e vogla, me fokus tek LSI e Ilir Metës. Marrëveshja asnjëherë nuk u bë publike, por është e qartë tashmë se ajo ka qenë një marrëveshje për bashkëqeverisje. 
Lulzim Basha mbylli në mënyrë të beftë, çadrën ku premtohej “Republika e Re” dhe hyri në marrëveshje me kundërshtarin. Pas asaj nate me Edi Ramën, ai përjashtoi nga PD, themelues dhe njerëz me kontribute të rëndësishme, duke mos i përfshirë ata në listën e kandidatëve për deputetë. 

Sa më shumë kohë kalon, aq më shumë do të marrim vesh detaje nga këto “perla” politike.