Qeveria shqiptare ka projektuar shtatë konçesione për vitin 2022. Kontratat me PPP janë kritikuar si nga opozita dhe nga ekspertët për shkak se “thithin” një pjesë të mirë të të ardhurave në buxhetin e shtetit.

Koncesionet e planifikuara janë:

– Ndërtimi dhe operimi i aeroportit të Sarandës

– Për ndërtimin, operimin dhe mirëmbajtjen e portit të integruar “Triport Vlorë”

– Për ndërtimin e segmentit rrugor Milot-Fier në autostradën Adriatiko-Joniane

– Dhënia me koncesion/PPP e infrastrukturës së bazës së të dhënave dhe mbikqyrjes së qëndrave të kontrollit

– Për ofrimin e shërbimit të infrastrukturës së çelsave publik PKI

– Për përmirësimin e infrastrukturës rrugore dhe rekreative të blloqeve të banimit në disa lagje të qytetit të Elbasanit

– Rritja e sigurisë rrugore

Këto shtatë kontrata koncesionare do të kushtojnë rreth 214.5 miliardë lekë, duke zënë rreth 11% të PBB-së së parashikuar për vitin 2022.

Kujtojmë se qeveria sapo ka emetuar një eurobond me vlerë 650 milionë euro, pasi shpenzimet e projektuara për vitin 2022 nuk mbuloheshin me të ardhurat e planifikuara. Marrja e këtij eurobondi me afat maturimi 10-vjeçar do të thotë rritje e mëtejshme e borxhit publik.

Sipas Sektorit, nga projektet e reja koncesione PPP të planifikuara, 4 janë në sektorin e transportit (rrugor, detar dhe ajror), ndërsa tre për zhvillimin urban.

Dy nga këto kontrata koncesioni PPP, janë tashmë konfirmuar me mbështetje nga buxheti i shtetit, dhe një është me financim privat. Për katër kontratat e tjera ende nuk ka informacion se si do jetë forma e financimit.

Konkretisht, projekte me mbështetje nga buxheti i shtetit, janë planifikuar të jenë koncesioni për ndërtimin, operimin dhe mirëmbajtjen e portit të integruar  “Triport Vlorë” dhe ai për përmirësimin e infrastrukturës rrugore dhe rekreative të blloqeve të banimit në disa lagje të qytetit Elbasan.

Burimi: Open Data Albania