Rënia e flokëve është një nga problemet më shqetësuese dhe nuk është aspak e pazakontë. Të shumtë janë ata që e vuajnë përditë faktin që e shohin krehërin të mbushur plot sa herë që mbarojnë me krehjen. Nëse keni provuar maska e trajtime të ndryshme pa efekt, kthejeni njëherë kokën nga maskat e bëra në shtëpi. Gjithashtu, Agroweb ka përmbledhur disa këshilla që duhet t’i keni parasysh, nëse doni të reduktoni rënien e flokëve.

Kujdes me ushqimin

Ushqimet që konsumoni gjatë ditës tuaj normale ndikojnë drejtpërdrejt edhe në shëndetin e flokëve. Kështu që, mundohuni të shtoni në dietën tuaj ushqime dhe gatime të cilat promovojnë rritjen e mirë të tyre. Këtu futen proteinat si mishi, vezët, drithërat, djathi e peshku. Zgjidhni gjithnjë yndyrna me origjinë bimore si arrat, avokado, vaji i lulediellit dhe vaji i ullirit. Të gjjtha këto ushqime janë të shkëlqyera për forcimin e flokëve sepse sigurojnë shumë acid linoleik dhe vitamina. Gjithashtu sigurohuni që të merrni edhe shumë vitamina A, B dhe C. Këto të fundit do të përmirësojnë formimin dhe mirëmbajtjen e qelizave dhe metabolizmi të fortë. Plotësoni dietën tuaj me acid folik, biotinë dhe squfur. Mungesa e këtyre substancave në trup do të thotë flokë më të dobët.

Maskat dhe trajtimet

Trajtimi me metoda natyrale dhe rigjenerimi natyral janë gjithnjë mënyra të mira për të trajtuar flokët. Ndiqni disa prej tyre që mund t’ju ndihmojnë më poshtë.

Trajtimi me vezë

Përbërësit

– 45 ml vaj bajame

– 15 ml uthull molle

– 1 vezë

Përgatitja

Përzieni të gjithë përbërësit bashkë në një enë të thellë dhe vendosini në rrënjën e flokëve duke masazhuar. Lëreni në kokë të paktën gjysmë ore dhe më pas lajeni me ujë dhe shampo si zakonisht.

Trajtimi me aloe vera

Përberësit

– 1 gjethe aloe vera

– 1 vezë

Përgatitja

Përziejini të dy përbërësit në një enë duke hequr me kujdes të gjithë xhelin e aloes nga gjethja. Aplikojeni maskën në rrënjën e flokëve dhe lëreni derisa të thahet e më pas shpëlajeni me ujë dhe shampo. Bëjeni këtë trajtim të paktën një herë në javë para se të bëni dush.

Zgjidhni shampon e duhur

Megjithëse në treg ka shumë shampo dhe trajtime që sigurojnë volumin e flokëve tuaj ju mundet që gjithnjë të zgjidhni produktet natyrale. Zgjidhni shampo sa më natyrale dhe sa më pak të ashpra me flokët tuaj. Një mënyrë e mirë për të rritur flokët është masazhimi i skalpit me vajra të ndryshëm esencial. Kjo mënyrë stimulon qarkullimin më të mirë të gjakut dhe shtimin e fijeve të flokut. Mund të përdorni9 vaj bajameje, ulliri, rozmarine, kokosi apo kastori për të masazhuar kokën disa minuta para dushit.

Stilimi i flokëve

Të kesh flokë të bukur për shumë njerëz do të thotë edhe t’i stilosh ato sipas modeleve të fundit. Kështu rritet përdorimi i paisjeve që i japin nxehtësi flokut apo e mbushin atë me kimikate. Kjo mënyrë nuk rekomandohet thuajse asnjëherë e veçanërisht kur keni flokët të dëmtuar apo të dobët. Në vend të kësaj mënyre zgjidhni të keni një stil sa më natyral dhe të shëndetëshëm të tyre.

Qëndroni larg stresit

Stresi është një nga shkaqet kryesore të humbjes së flokëve. Nëse keni flokë të hollë dhe po kaloni një periudhë stresuese jeni akoma më shumë të rrezikuar që të humbisni flokë. Mundohuni të shmangni stresin dhe të jetoni një jetë të qetë. Efektet psikologjike të stresit dobësojnë flokët tuaj, duke bërë që ato të bien më lehtësisht.