Bafta 2022: ‘Power of the Dog’ fiton çmimet Fotografia dhe Regjisori më i mirë

Bafta 2022: ‘Power of the Dog’ fiton çmimet Fotografia dhe Regjisori më i mirë

Filmi ‘Power of the Dog’ i regjisores Jane Campion, i zhanrit uestern, me rol kryesor Benedict Cumberbatch, ka fituar dy çmimet kryesore në Akademinë e Filmit Britanik, e njohur ndryshe si Bafta.

Cumberbatch pranoi çmimin për regjisoren më të mirë, në mungesë të Campion, e cila ishte ende në Los Anxhelos, ku mori pjesë në ceremoninë e çmimeve ‘Directors Guild America’, të shtunën.

Cumberbatch nuk arriti të fitojë në kategorinë e aktorit më të mirë në rol kryesor, ku u mposht nga Will Smith në paraqitjen e tij si babai i Venus dhe Serena Williamsit në filmin ‘King Richard’. Ky çmim e shndërron Smith në favoritin kryesor për triumf në ‘Oscars’ pas pak kohësh, ku Campion po ashtu po konsiderohet si një prej kandidatëve më seriozë për të fituar. Reinaldo Marcus Green, regjisori i ‘King Richard’, mori çmimin në vend të aktorit.

Aktorja më e mirë u shpall Joanna Scanlan, veterania uellsiane, e cila dhuroi një performancë brilante si një myslimane e konvertuar në filmin debutues të Aleem Khan, ‘After Love’. Scanlan falenderoi Khan, poashtu edhe prindërit dhe burrin e saj, Neil, ‘’të cilët janë dëshmi e gjallë se nuk ka diçka të tillë si ‘after love’’’.

Joanna Scanlan pozon në dhomën e fituesve, pasi triumfoi në garën për aktoren më të mirë për rolin në ‘After Love’.
Fotografisti: Samir Hussein/Wirelmage

‘Dune’ i Denis Villenueves, me rol kryesor Timothee Chalamet, fitoi më së shumti çmime në këtë event, pesë në total, duke qenë i pakapshëm në kategoritë teknike, përfshirë kinematografinë, dizajnin e produksionit, efektet vizuale dhe zërimin.

Keneth Branagh fitoi çmimin e filmit britanik të jashtëzakonshëm, për dramën e tij autobiografike, ‘Belfast’, dhe shfrytëzoi fjalimin për të falënderuar ndjekësit e kinemasë që vendosën të shikojnë filmin e tij.

Ngjarja e së dielës mbrëma ishte një rikthim në jetën reale për Bafta, që u shfaq para një turme me kapacitet të plotë në ‘Albert Hall’. Si 85-vjeçare, Shirley Bassey hapi shfaqjen me performancën e ‘Diamonds Are Forever’ për të shënuar 60-vjetorin e ‘Dr. No’, duke i dhënë tone emocionuese ceremonisë.

Kishte referenca të pakta për pandeminë dhe vetëm përmendje kalimtare të pushtimit të Ukrainës, përfshirë një ‘kunj’ nga Andy Serkis dhe Rebel Wilson për politikat e imigrantëve të sekretares shtetërore britanike, Priti Patel.

Wilson fitoi duartrokitjet më të mëdha pasi ngriti gishtin e mesit dhe shpjegoi ‘’në të gjitha gjuhët e shenjave, kjo është shenja ndërkombëtare për Putinin’’.

Ky gjest u turbullua vizualisht në ekranet televizive, për të cilat Wilson më herët kishte thënë se nuk do të mund ta parandalonin paraqitjen e saj të guximshme. Ajo foli hapur dhe qartë në monologun interesant, duke shprehur edhe dëshirën që t’i ulej në fytyrë aktorit Daniel Craig dhe të vizantonte majat e gjinjve në logon e (agjentit) 007.

Më vonë, Wilson zbuloi një tortë që kishte bërë në formën e fytyrës së aktorit Cumberbatch, duke e parafrazuar me fjalët “në mënyrë që t’u them njerëzve se e kisha atë brenda meje”.

Ajo gjithashtu bëri komente shtesë për aktorin Armie Hammer – i cili ka qenë në mesin e një situate kontraverse pasi kishte shprehur fantazi për përdhunim seksual dhe kanibalizëm, martesën e hapur të Will dhe Jada Pinkett Smith dhe disa zhvillime tjera politike.

Princi William, presidenti i Bafta, nuk mori pjesë në ceremoni për shkak të “kufizimeve të ditarit” (me gjasë të orarit të ngjeshur, por thënë në gjuhë aristokrate princërish nga William) por dha një prononcim përmes një videoje, ku shprehu krenarinë për skemën mentoruese të Bafta.

Troy Kostur u bë aktori i parë memec që fiton një çmim Bafta, për rolin e tij në dramën familjare ‘Coda’, duke e vënë veten në ‘pole pozicion’ për ‘Oscars’. Kostur është vetëm aktori i dytë memec ndonjëherë që nominohet për një çmim akademik, pas bashkëkolegut të tij te ‘Coda’, Marlee Matlin, i cili kishte fituar 35 vjet më parë. Filmi gjithashtu fitoi çmimin si skenari më i mirë i adaptuar.

Trofeu për aktoren më të mirë në rol dytësor shkoi për Ariana DeBose, pjesëmarrja në ‘West Side Story’ e së cilës ishte debutim në ekranin filmik. DeBose i thuri lavde kastës së aktorëve të filmit dhe regjisores, Cindy Tolan, e cila më herët gjatë mbrëmjes kishte triumfuar në kategorinë e saj.

Ariana DeBose pozon me çmimin për aktoren më të mirë në rol dytësor.
Fotografisti: Peter Nicholls/Reuters

‘Encanto’ nga Lin-Manuel Miranda u emërua si animacioni më i mirë. Duke folur në podium, kompozuesja Germaine Franco tha se deshi të bënte një film që u tregon “fëmijëve të mi të bukur ngjyrë kafe se janë të dëgjuar dhe të rëndësishëm.”

Paul Thomas Anderson ishte fitues i befasishëm në skenarin origjinal për drama-komedinë e tij ‘Licorice Pizza’. Ylli i filmit, Alana Haim dhe kompozuesi Jonny Grenwood, morën çmimin në mungesë të tij.

Ryusuke Hamaguchi fitoi çmimin për filmin më të mirë në gjuhë të huaj për ‘Drive My Car’, projekt epik nga ai bazuar në storien e shkurtër të Haruki Murakamit. Filmi po shikohet si pasues i filmave si ‘Parasite’, në kalimin nga Festivali i Kanës, ku kishte fituar tre çmime, te një triumf substancial për ‘Oscars’, ku është i nominuar për katër çmime, përfshirë regjisorin më të mirë.

Çmimet u ndanë pas votave nga 7 mijë pjesëtarë të Akademisë Britanike të Filmit, e cila ka bërë ndryshime rrënjësore në program, që prej kritikave të rënda për mungesë diversiteti në listën e ngushtë, dy vjet më parë. Plot 220 rregulla të reja u sollën në fuqi, të cilat sollën frytet e veta në eventin e këtij viti.