Si të heqim tatuazhet ? Shpiket metoda pa dhimbje për të hequr tatuazhet

Një student i Mjekësisë në Kanada ka shpikur një krem, i cili do të bëjë revolucion për sa i përket heqjes së tatuazheve pa dhimbje. Ai është në përfundim e sipër të një kremi i cili do t’u vijë në ndihmë të gjithë atyre të cilët duan të heqin tatuazhet, pa shumë shpenzim

Në cilin vend të trupit mund ta bëjë, të dukshëm apo të fshehtë? Bardhezi apo me ngjyra? Çfarë dizenjo do të ishte më e bukur? Por sidomos pyetja më e rëndësishme është: si mund ta heq tatuazhin nëse nuk më pëlqen më? Këto janë pyetjet më të zakonshme që zakonisht bëhen nga çdokush përpara se të bëjë një tatuazh. Në fakt, ajo e heqjes së tatuazhit është sigurisht më e vështira, sepse boja mund të mbesë përgjithmonë në lëkurë. Por më në fund një student shkencëtar ka gjetur një mënyrë pa dhimbje për të hequr tatuazhet të cilat mund të mbesin për të gjithë jetën në trupat njerëzorë: me qëllim për të zëvendësuar lazerin e urryer ka krijuar një krem i cili do të mund të eliminojë totalisht tatuazhet e padëshiruara.

Tatuazhet janë kthyer tashmë në një lloj arti shumë të përhapur. Ata që janë profesionistë në këtë drejtim po shtohen gjithnjë e më shumë, ndërsa këtë art e kanë një punë të përditshme. Tatuazhet tashmë vlerësohen si nga ata që dëshirojnë një në lëkurën e tyre si nga profesionistët e dizenjove. Por gjithsesi, ndjenja e pendesës, herët a vonë, i kap të gjithë.

Por me recetën e re të një kremi i cili mund të heqë çdo lloj boje tatuazhi më në fund çdokush mund të bëjë një tatuazh pa u menduar dy herë. Patenta e këtij produkti është e një studiuesi 27-vjeçar, student i departamentit të patologjisë së një universiteti kanadez.

Por si do të funksionojë metoda për të hequr tatuazhet?

Një tatuazh para së gjithash është rezultati i përgjigjes imunitare që trupi gjeneron prej stimulimit nga injektimi i bojës.

Lëkura është në gjendje që të mbajë bojën falë veprimit të qelizave të quajtura makrofage, të ashtuquajtura “thithëse” të trupit njerëzor, sepse thithin gjithçka. Në rastin e një tatuazhi, makrofaget konsumojnë shumë bojë duke qëndruar në sipërfaqen e lëkurës, duke formuar një tatuazh të vërtetë.

Shpikja e studiuesit konsiston në një krem që operon në mënyrë të kundërt. Substanca do të jetë në gjende që të stimulojë urinë e llojeve të tjera të makrofageve, në mënyrë që mund të absorbojnë bojën dhe ta transportojnë larg nga sipërfaqja e dukshme e lëkurës. Një sistem që do të shmangte injeksione të tjera të dhimbshme dhe inflamacionin, sepse tatuazhi më pas do të venitet vetvetiu.

Studiuesi po merret ende me shpikjen e tij, për të cilën po kërkon ende fonde dhe për momentin nuk është në gjendje që të konfirmojë me siguri sesa seanca janë të mjaftueshme për të hequr plotësisht një tatuazh, por sigurisht që çmimi do të jetë ekonomik. Për shembull, një tatuazh me sipërfaqe 10 centimetra katrorë do të kushtojë përafërsisht 5$, përkundër një trajtimi me lazer që mund të kushtojë edhe qindra dollarë.

Ndër të tjera, shpikësi do të deklarojë publikisht se heqja e tatuazheve të padëshirueshëm me krem është një procedurë e sigurt: ndërkohë që lazeri djeg lëkurën, duke shkaktuar flluska e më pas plagë e shenja të dallueshme, krijuesi i kremit magjik ka siguruar se trajtimi që ka ideuar me ekipin e tij nuk do të shkaktojë asnjë inflamacion ose pasojë estetike.

Deri më tani, pas testeve të kryera, kremi ka rezultuar tepër efikas. Ndërkohë ajo gjë që i ka bërë përshtypje komisionit universitar, është tregtueshmëria e idesë së tij për jetën reale. Ata që do të përfitojnë menjëherë do të jenë padyshim ata të cilët kanë bërë tatuazh dhe më pas janë penduar.

Përllogaritet që gjatë një tatuazhi lëkura shpohet nga 50 deri në 3 000 herë në minutë. Statistikat tregojnë se 15% e të rriturve dhe 30% e të rinjve kanë të paktën një tatuazh. Në SHBA, janë rreth 40% të të rriturve me të paktën nga një tatuazh. Në vitin 2012, numri i vajzave që bënë tatuazhe e kaloi atë të djemve.

Disa studime tregojnë se rreth 30% e personave që kanë tatuazhe kanë menduar t?i heqin. Por kjo është një ndërhyrje e dhimbshme, që kryhet me lazer dhe nuk garanton efikasitet mbi të gjitha ngjyrat. Bluja dhe e zeza janë më të lehta për t?u hequr, ndërsa e kuqja, e gjelbra dhe e bardha, më të vështira.