Këmishë e verdhë, pantallona lëkure të zeza, flokë me xhel dhe aksesorë floriri. Imane Khelif, fituese e medaljes së artë në Lojërat Olimpike Paris 2024, u shfaq plot shkëlqim, si një divë e vërtetë, në Javën e Modës në Milano.

Kampionia e boksit ishte e ftuar në shfaqjen e Bottega Veneta dhe pranë saj ishin ulur disa persona të famshëm, mes të cilëve edhe aktorja hollivudiane, Julianne Moore.

Imane u prit si yll nga fansa: autografe për të gjithë dhe buzëqeshje të mëdha. Të njëjtat ajo i ka treguar edhe në postimet dhe videot e saj të publikuara në Tik Tok dhe Instagram me të mbërritur në kryeqytetin e modës.

Gjatë përvojës në Olimpiadë, boksierja algjeriane ishte në qendër të një sensacioni mediatik ndërkombëtar që e vuri në provë. Ajo ishte “akuzuar” nga eksponentë të ndryshëm të botës së sportit dhe politikës për shkelje të rregullave për të përfituar, (sidomos) në ndeshjen me atleten italiane Angela Carini në fazën e 16-ave të peshës së lehtë për femra në Lojërat e Parisit.

Disa politikanë italianë e identifikuan Khelif si një “grua trans”, duke përhapur lajmin e rremë se asaj i ishte përcaktuar seksi mashkull në lindje dhe më pas kishte kaluar në tranzicion. Më pas pati shumë lajme kontradiktore dhe polemika për kampionen.

Imane Khelif, megjithatë, asnjëherë nuk e ka përcaktuar veten si interseks. Në fakt, atletja e lindur në vitin 1999 ka konkurruar gjithmonë në garat e femrave dhe gjithmonë e ka identifikuar veten si femër, siç duket edhe nga dokumentet e saj të lindjes.

Dhe, siç pranoi edhe presidenti i Komitetit Olimpik Ndërkombëtar Thomas Bach, “Imane është një grua dhe ka garuar për 6 vjet në nivel ndërkombëtar”.