Shumica prej nesh përballemi me një gjendje të njohur si melankolia e vjeshtës. Melankolia e vjeshtës ndodh kur jo vetëm natyra dhe peizazhet përreth përjetojnë ndryshimin, por edhe ne brenda vetes. Ka disa arsye pse e përjetojmë pak keq këtë ndryshim, por të gjitha të çojnë në një përfundim: Është procesi që ndodh në trup, ndryshimet duke filluar që me qarkullimin e gjakut dhe ngacmuesit e jashtëm të cilët na bëjnë të ndjejmë e përjetojmë nervozizëm, mungesë përqendrimi, humbje të fuqive, madje edhe probleme me gjumin.

Gjatë periudhës së vjeshtës, reduktohet numri i ditëve me diell e në vend të tij fillojnë reshjet dhe ditët me re të zymta. Dielli ka një impakt shumë të rëndësishëm të trupit tonë. Drita dhe rrezet e diellit janë anti-depresanti më i mirë, që largon ndjenjat e melankolisë dhe trishtimit e në vend të kësaj na ushqen me ndjenja pozitive dhe lumturie. Kjo për shkak se rrezet ultraviolet të diellit lëshojnë endorfinë- që njihet ndryshe si hormoni i të ndjerit mirë.

Kështu, çfarë duhet të bëjmë dhe si duhet të jetojmë në këtë fazë paksa depresive të vjeshtës? Më poshtë keni disa sugjerime.

Kërko dritën, është mirë të dalësh e të bësh shëtitje në qiell të hapur, sidomos kur dita është me diell. Kur të jesh në shtëpi, mundohu të shmangësh zymtësinë dhe errësirën e qiellit natën. Mbyll perdet dhe të nesërmen në mëngjes, hapi dhe shijo sërish dritën e natyrës.

Jo të gjithë e përjetojnë shumë keq depresionin e stinës. Ekspertët thonë se niveli i depresionit dhe stresit lidhet edhe me gjenetikën. Thuhet se këta njerëz kanë një problem lidhur me neuro-transmetuesit në tru. Këto neuro-transmetues janë përgjegjës për gjendjen tonë emocionale.

Një nga shkaktarët kryesorë të depresionit është stresi. Çdo njeri sillet rreth katër sferave të jetës; Shëndeti, paraja, lidhjet interpersonale dhe lidhjet sociale. Nëse përjeton probleme në një nga këto sfera, të gjitha e ndjekin pas duke shkaktuar problemet me shëndetin mendor.

Çfarë duhet bërë konkretisht?

Fillimisht duhet të gjesh se çfarë të shkakton stres, e më pas të bëj gjithçka për ta eliminuar. Bëj sport, është një mënyrë shumë e mirë për të përballuar dhe ulur nivelin e depresionit. Mund të shkosh edhe në palestër të ushtrohesh e të mbash trupin dhe shëndetin në formë të mirë.

Skedulo gjërat që do bësh gjatë ditës: Mbaj shënim se kur shkon në punë, kur kthehesh, çfarë ushqimesh konsumon, çfarë pijesh e më pas shëno orën kur shkrihesh në shtrat. Është një ide e mirë për të mbajtur nën kontroll veten e gjithashtu të bësh plane për tu argëtuar në kohën e lirë.

Udhëto: Nuk ka ide më të mirë sesa të largohesh qoftë për pak ditë në ndonjë vend interesant dhe të qetë.

Sillu mirë me veten: Kjo këshillë vlen shumë për ata që janë shumë kërkues ndaj vetes dhe ndoshta e qortojnë veten në një masë që nuk duhet. Mendo gjëra pozitive edhe kur merr një lajm të hidhur.

Ndrysho ngjyrat e shtëpisë: Vjeshta është koha ku duhet patjetër ti ndryshosh ngjyrat e mureve apo perdeve në shtëpi. Lyej një faqe muri me ngjyrë të ndezur. Nëse jashtë bie shi me gjyma, ngjyrat e ndezura brenda shtëpisë nuk do të lenë të mërzitesh.