Shkruar nga Daniel McCarthyDonald Trump

Hillary Clinton ka një leksion të thjeshtë por të hidhur për mbështetësit e Donald Trump në zgjedhjet e këtij viti: mënyra më e mirë për të humbur zgjedhjet, është të supozosh se i ke fituar ato një javë përpara se të mbahen votimet. ​

Lëvizja MAGA – që synon ta bëjë Amerikën sërish madhështore, pra duke e bërë Trumpin sërish president – ​​nuk ka qenë kurrë më e sigurt se sa sot për triumfin.

Sondazhet tregojnë se Trump, ka ecur shumë më mirë kundër Kamala Harris sesa kundër Clintonit në vitin 2016 apo Joe Biden në 2020-ën. Dhe meqë sondazhet e nënvlerësuan pjesën e tij të votave 2 zgjedhjet e fundit, ndoshta po e nënvlerësojnë sërish. Ndaj besohet se Trump jo vetëm që do të fitojë një mandat të dytë, por do ta arrijë këtë me shumë lehtësi.

Sigurisht, në momentin që flasim, në të djathtë ka një ndjenjë gëzimi, ndërsa majtas ka nisur të ndihet frika. Fakti që Washington Post, Los Angeles Times dhe  USA Today, tre nga gazetat më të mëdha dhe më të besueshme liberale të vendit, e kanë shkelur traditën duke refuzuar të mbështesin ndonjë kandidat këtë vit, është një shenjë ogurzezë se pronarët e tyre e shohin Harrisin si një humbëse më 5 nëntor.

Megjithatë, e gjithë kjo ndjesi është shumë mashtruese. Trump është ende më i dobët se Harris, sado që shumë shenja duken në favor të tij kohët e fundit. Së pari, epërsia e Trump në sondazhet e shteteve më kyçe në zgjedhje, është zakonisht brenda kufirit të gabimit. Mesazhi që përçojnë ato sondazhe, është se gara është e barabartë

Megjithatë fansat e thekur të Trump, po e trajtojnë avantazhin e ngushtë prej vetëm 0.6 për qind – diferenca aktuale në Pensilvani – sikur të ishte 6 për qind. Në vitin 2016, Trump fitoi në Pensilvani me 0.72 për qind diferencë, dhe e humbi me 1.17 për qind më pak vota në 2020-ën.

Gjërat mund të shkojnë kështu edhe këtë vit. Nga ana tjetër, Harris ka ende 3 pika të forta në favor të saj. Së pari, fushata e saj ka shumë më tepër para sesa ajo e Trump. Midis janarit 2023 (kur fushata e Harris ishte ajo e Joe Biden) dhe mesit të tetorit të këtij viti, Harris mblodhi rreth 1 miliard dollarë, krahasuar me 388 milionë dollarët e Trump.

Së dyti, harta elektorale i jep Harrisit një pikënisje më të fortë në shtetet e lëkundura që cilësohen si vendimtare. Nga 7 shtetet ku zakonisht ndodh përballja më e fortë, 5 drejtohen nga guvernatorë demokratë. Po ashtu, demokratët dolën mirë në të 7 shtetet në zgjedhjet e mesit të mandatit të vitit 2022 për Senatin.

Kur republikanët citojnë rekordin e Trump për përgënjeshtrimin e sondazheve në vitet 2016 dhe 2020, demokratët i kundërshtojnë ato me sondazhet shumë të sakta në zgjedhjet e mesit të mandatit, që treguan se partia e Trump nuk arriti fitoret e mëdha që parashikuan shumë analistët dhe ekspertë (përfshirë mua). Ndërkohë, demokratët pretendojnë se shumë nga sondazhet që tregojnë kryesimin e Trump janë të një cilësie më të ulët, krahasuar me të tjerat që tregojnë se Harris është në avantazh ose baras në mbështetje.

Së fundi, me gjithë mosgatishmërinë e 3 gazetave të mëdha për të mbështetur Harris, ajo gëzon të gjitha avantazhet që vijnë nga të qenit kandidatja e preferuar e medias dhe shtresave që formojnë opinione. Ajo mund të mbështetet në mbulimin e favorshëm nga mediat kryesore të lajmeve dhe mbulimin tejet armiqësor ndaj Trump.

Kur një komedian në mitingun e Trump në Madison Square Garden në Nju Jork bëri një shaka fyese për Porto Rikon, media i bëri shumë jehonë këtij momenti. Dhe jo pa qëllim:Në SHBA jetojmë më shumë se 5 milionë portorikanë, 472.000 vetëm në Pensilvani.

Mediat me prirje liberale e kanë krahasuar tubimin e Trumpit në Madison Square Garden me një tubim nazist, të mbajtur në të njëjtin vend në vitin 1939. Edhe pse sipas sondazhit më të fundit të Gallup, vetëm 27 për qind e amerikanëve që e përshkruajnë veten si të pavarur, thonë se u besojnë mediave, etiketimet e vazhdueshme të Trump si fashist, racist, pro-Putin, i çmendur apo kriminel, kanë efektin e tyre publiku.

Ndërkohë Harris, po përpiqet të marrën votën e republikanëve të shqetësuar nga qëndrimet e Trump ndaj Ukrainës dhe NATO-s, si dhe të atyre që ende janë të tronditur nga trazirat në Capitol Hill më 6 janar 2021. Në këtë kuadër, ajo ka bërë fushatë së bashku me ish-kongresmenen republikane Liz Cheney.

Po ashtu, është mburrur me mbështetjen e babait të Liz, zv/presidentit amerikan Dick Cheney në vitet 2001-2009, të cilin e majta amerikane e konsideronte dikur po aq fashist sa Trumpin sot. Nëse fiton Harris, neo-konservatorët do të kërkojnë revansh ndaj Trumpit.

Nëse humbet, do të jetë më e qartë se kurrë, se Trump përfaqëson armiqësinë e votuesve jo vetëm për Partinë Demokratike të Harris, Biden dhe Clinton, por edhe për Partinë Republikane të familjeve Bush dhe Cheney.

“The Spectator”