BUZËQESHNI
Kaq e thjeshtë është! Buzëqeshja ju bën të dukeni më të ngrohta, më pozitive, më të afrueshme. Një njeri që të tjerët duan ta kenë pranë. Buzëqeshja është shumë tërheqëse. Kur buzëqeshni, edhe pse ju krijohen shumë rrudha rreth syve, njerëzit e kanë mendjen te buzëqeshja juaj e mrekullueshme. Askush nuk i vëren rrudhat rreth syve.

RREGULLONI DHËMBËT
Shpeshherë meshkujt tullacë i kërkojnë këshilla Majkëllit, kur nuk dinë ç’të bëjnë për rënien e flokëve. Ai gjithmonë u thotë:
“Rregulloni dhëmbët”. Kjo është shumë e vërtetë. Nuk duhet nënvlerësuar fuqia e dhëmbëve të bukur. Njerëzit adhurojnë të shohin një buzëqeshje të këndshme dhe rregullimi i dhëmbëve shton vetëbesimin. Kur pashë fëmijët e mi që mbanin tela, u frymëzova ta bëja dhe unë. Kjo u shndërroi atyre mënyrën e buzëqeshjes, ndaj mendova ta provoja dhe unë. Vura telat “Invisalign®”.

Janë të tejdukshme dhe ndihmojnë në drejtimin e dhëmbëve. Kanë bërë një ndryshim të madh tek unë. Vlen të përmendet se isha në të 50-at kur i vura. Pra, nuk ka kufi moshe.

NGRIJINI GJINJTË
Me kalimin e moshës, veçanërisht nëse lindim fëmijë, gjinjtë fillojnë të bien. Befas nuk janë më në vendin ku ishin. Të gjitha fillojmë t’i lirojmë rripat e sutienave, madje aq shumë, saqë ndonjëherë duket sikur kemi vënë tiranda, jo sutiena. Mos e bëni këtë. Shtrëngojini rripat e sutienave dhe ngrijini gjinjtë. Gjinjtë tuaj do të duken të mrekullueshëm. Thjesht kanë nevojë për një mbështetje shtesë dhe gjallëri. Meqë po flasim për këtë, kontrolloni sirtarin e të brendshmeve dhe zhdukini sutienat që kanë parë ditë më të mira. Mbaj mend që lexova një sondazh që thoshte se gratë vishnin vetëm 2 palë sutiena për 1 dekadë të tërë. Dhjetë vjet! Mendoni sa ndryshime hormonale kanë

kaluar gjinjtë tuaj gjatë 1 dekade, le pastaj sa herë janë larë sutienat në lavatriçe! Nëse dikur ishin të bardha dhe tani janë
gri, ju e dini se ç’duhet të bëni: flakini! Bëni stërvitje, blini diçka të re, të rehatshme, seksi apo mbështetëse, si të doni. Rikthejeni dekoltenë në jetën tuaj.

MJAFT ME RËNKIME
E keni kapur veten duke bërë “uf” e “puf” sa herë që përkuleni për të marrë diçka? Duket si thirrja e pleqërisë. Gjatë viteve të fundit, sa herë që përkulesha për të hequr atletet, dëgjoja veten duke rënkuar. Në çast u ndjeva si 500 vjeçe. Nuk mbaj mend të kem lëshuar tinguj të tillë kur isha 30 vjeçe. M’u desh të stërvitja veten, të kafshoja buzën, që të mos e bëja më. Nëse e keni bërë edhe ju, ndaloni. Mos rënkoni!

ECNI ME NJË QËLLIM
Të rinjtë ecin sikur po shkojnë diku. Teksa mosha kalonte, vura re se ecja ime u ngadalësua. Mendova: “Zot, tani nuk duket më sikur po shkoj diku!” Jo vetëm kaq, por kur ngadalësoni ecjen, nuk digjni më aq shumë kalori sa dikur. Pra, mos harroni të ruani ritmin e hapave, sepse kur e bëni, stërviteni. Gjithashtu, dukeni më të reja. Ecja e shpejtë çliron endorfina, të cilat i duam. Vendosni kufjet në vesh dhe nxitoni! Muzika do t’ju ndihmojë të zgjidhni ritmin e hapave.

*Shkëputur nga libri “Menopauza” botimet Living.