Pak ditë pas Ditës së Inaugurimit dhe pas shumë diskutimeve për kapelën e saj, Melania Trump kthehet në vëmendje me portretin e saj të parë zyrtar si ‘Zonja e Parë’ e re e Amerikës.

Me një foto bardhë e zi, bashkëshortja e presidentit të 47-të të Shteteve të Bashkuara, Donald Trump, ka hapur profilin e saj në Instagram (me emrin @flotus, që do të thotë First Lady of the United States), duke veshur një kostum që nuk është ai i zakonshmi.

Një xhaketë tuxedo e ngushtë, me fund të gjerë, të zbukuruar me satin, një këmishë të bardhë të zbërthyer dhe pantallona të zeza, dhe për të kompletuar pamjen, një tjetër element që duket si i vjedhur nga garderoba mashkullore: shiriti tipik i smokingut rreth belit.

Zgjedhja e Melanias, e firmosur nga Dolce & Gabbana, u interpretua menjëherë si një formë e re e ‘power dressing’, një stil formal i ribërë, por i karakterizuar nga një nuancë femërore e fuqishme dhe e vendosur. Po ashtu, si dhe poza e saj: me obeliskun e National Mall në Washington pas shpine, Melania Trump shfaqet në këmbë, duke qëndruar përpara një tavoline, me duar të vendosura mbi të, duke shfaqur një qëndrim të fortë, si një grua udhëheqëse dhe biznesmene.

Një zgjedhje tjetër nga ajo e vitit 2017, kur në portretin zyrtar që shënonte nisjen e mandatit të parë të Trump, ajo u paraqit tërësisht në të zeza, gjithashtu me një xhaketë, por me duar të kryqëzuara, një qëndrim që padyshim e drejtonte vëmendjen te bizhuteritë e saj të bukura.

Sot, e gjejmë atë më të drejtpërdrejtë, gjithmonë me stil, por më pak e mbushur me bizhuteri: pothuajse sikur të dojë të theksojë se në Shtëpinë e Bardhë, përveç kapelave dhe mantelve të rrepta, ajo po mban edhe pantallonat.