100 vjet FENDI

Stili i Fendi-t është një përzierje delikate e klasit dhe elegancës, historisë italiane, me elemente baroke dhe romane, mes klasikes e modernes, një brand luksoz, i cili feston sivjet 100-vjetorin e krijimit. Nga krijimi deri në ditët e sotme, Fendi ka spikatur për fuqinë e gruas, por edhe diversifikimin, duke krijuar një perandori sa artizanale, por edhe të sofistikuar, duke dalluar për krijimet ultramoderne.

Saga Fendi

Marka Fendi është mbi të gjitha një histori suksesi familjare. Në Romën e vitit 1925, në një punishte të vogël çifti Adele dhe Eduardo Fendi filluan të prodhonin produkte leshi dhe lëkure. Marka mori hov kur 5 vajzat e familjes e transformuan në një perandori të vërtetë mode. Logoja e dyfishtë F lidhet me konceptin Fun Fur, duke ruajtur origjinalitetin e produktit, pasi krijimet e para ishin me bazë materialet e leshta.

Epoka Lagerfeld

Në vitin 1965, stilisti gjerman, Karl Lagerfeld u emërua drejtor artistik i kompanisë, duke i shtuar Fendi-t stilin e pakrahasueshëm, më të cilin vijon edhe sot. Një vit më pas, marka arriti sukses ndërkombëtar me prezantimin e koleksionit të parë të modës së lartë. Dy dekadat e ardhshme, portofolit ju shtuan linja për burra dhe gra, ku përfshiheshin veshje, këpucë, orë, parfume, syze, shalle dhe aksesorë shtëpie.

Parfumet

Përpos stilit të rafinuar, shtëpia romane e modës ka krijuar edhe një seri ultramoderne parfumesh që nga fillimi i viteve 1980, ku e para është Fendi for Women, e cila u lançua në 1985, duke u ndjekur nga Fendi Uomo në 1988. Gjatë historisë së prodhimit të parfumeve kompania ka krijuar 36 flakone, ku bie në sy stili i rafinuar italian, i kombinuar me aromat ekzotike të vendeve të largëta aziatike.

Baguette

Fendi është veçanërisht i njohur për çantat ikonike të cilësisë së lartë, ku secila prej tyre është një objekt i dashur për gratë. Mes modele prestigjioze janë Peekaboo dhe Moonlight, por një prej krijimeve më ikonike mbetet çanta Baguette e krijuar nga Silvia Fendi. E frymëzuar nga forma e bukës tipike franceze, prej vitesh kjo çantë është kthyer në një aksesor emblematik në botën e modës.

Epoka e Kim Jones

Pas vdekjes së Karl Lagerfeld-it, drejtori artistik i kompanisë u zgjodh Kim Jones, i cili ka ruajtur finesën italiane, duke e kombinuar me detaje moderne. Në vitin 1999, Fendi-t ju bashkua LVMH, kompanisë mëmë të Luis Vuitton, duke e klasifikuar një ndër markat më luksoze në botë. Në 100 vjet vlera financiare e markës Fendi-t është rritur vit pas viti, duke u vlerësuar në një kapital prej 6,3 miliardë eurosh.