Ishte janari i vitit 1998 kur Eni Çobani kurorëzoi në martesë dashurinë e saj me bashkëshortin, Avenirin. Siç kujton ajo në emisionin “Sol” në Klan Kosova, ishte fill pas vitit të vështirë të ’97-ës, vendi ku po festonin ishte me xhama të thyer e pa drita, por dasma ka mbetur një kujtim i paharrueshëm dhe i bukur.

Avokatja e njohur u pyet për çelësin e një martese të suksesshme, por gjithçka është shprehur më së miri nga një letër me të cilën bashkëshorti e ka surprizuar duke demonstruar më së miri përgjigjen e saj.

“E dashura ime Eni! Nuk e di nëse mund të shpreh me fjalë gjithë dashurinë dhe mirënjohjen që ndiej për ty, por do të përpiqem. Ti je jo vetëm bashkëshortja ime, por edhe shoqja, mbështetja dhe drita e ditëve të mia. Çdo moment pranë teje është një bekim dhe çdo ditë që kalon me ty më kujton sesa me fat jam që të kam në jetën time. Buzëqeshja jote më jep forcë, dashuria jote më bën njeri më të lumtur dhe mirësia jote më frymëzon çdo ditë. Ti je gruaja më e mirë në botë jo vetëm për mua, por për këdo që ka fatin të të njohë. Për ty çdo sfidë bëhet më e lehtë dhe çdo gëzim shumëfishohet. Të dua me gjithë zemrën time, sot dhe përjetë. Me dashuri dhe mirënjohje, Ave.”

Për herë të parë, avokatja tregoi se janë natyra shumë të ndryshme pasi ajo është më shprehëse ndërsa ai më i qetë, por thotë se është një nga arsyet e suksesit të saj.

Një nga shkaqet e suksesit tim është pikërisht qenia e tij. E them me shumë krenari sepse pa Avenirin në krah, ndoshta unë nuk do të isha Eni që ju shikoni në përditshmërinë time. Qetësia që ai më përcjell, dashuria pa diskutim, mbështetja në çdo moment për mua është një gjë shumë e madhe.

Në këto 30 vite bashkë, ajo ka jetuar edhe me prindërit e tij, për të cilët flet me vlerësimin më të madh.

Unë jam futur në një familje të mrekullueshme. Familja e Avenirit në kohën që unë jam futur në të, përbëhej jo vetëm nga prindërit, por edhe ngga motra e tij dhe kemi pasur një bashkëjetesë të jashtëzakonshme për disa vite së bashku, më pas motra martohet dhe largohet në familjen e saj dhe unë deri në fund të jetës së prindërve të Avenirit kemi qenë së bashku. Pra unë jam akoma nusja që ka jetuar me vjehrrin dhe vjehrrën. Nuk i kuptoj disa gra dhe zonja që e kanë problem jetesën me prindërit e bashkëshortit. Ajo ka qenë një përzgjedhje jo e kushtëzuar sepse ndoshta kishim mundësinë që të ndaheshim edhe në atë kohë, por unë nuk e konceptoja sesi mundet që të vija nga një familje me prindër dhe të ndaja bashkëshortin tim nga prindërit.