Partia Liberale e Kanadasë ka zgjedhur me shumicë dërmuese Mark Carney si kryeministër të ri të vendit, teksa ish-guvernatori i bankës kanadeze paralajmëroi për “ditë të errëta” të shkaktuara nga Shtetet e Bashkuara nën presidencën e Donald Trumpit. Carney do të qëndrojë në detyrë në mbajtjen e zgjedhjeve të reja të përgjithshme.

Ish-shefi i bankës qendrore Mark Carney është vendosur të pasojë kryeministrin Justin Trudeau teksa ai udhëheq Kanadanë gjatë javëve të trazuara ekonomikisht dhe në zgjedhjet e reja të pritshme.

Ekonomisti 59-vjeçar fitoi shumë qartë zgjedhjet për kryetar të Partisë Liberale me 85.9 për qind të votave të anëtarëve, duke mposhtur ndër të tjera edhe ish-zëvendëskryeministren Chrystia Freeland. Ajo doli e dyta me tetë për qind.

Duke udhëhequr partinë, ish-kreu i bankave qendrore britanike dhe kanadeze do të marrë gjithashtu detyrën e kryeministrit nga Trudeau, të paktën për momentin. Pas disa javësh, ka të ngjarë të ketë zgjedhje të reja në vendin e dytë më të madh në botë, i cili është nën presion të madh për shkak të politikës agresive tarifore të presidentit amerikan Donald Trump dhe kërcënimeve për aneksimin.

“Ne e kemi bërë këtë vendin më të mirë në botë dhe tani fqinjët tanë duan të na marrin përsipër. “Absolutisht jo!” tha Carney pak para se të shpalleshin rezultatet. Edhe kandidatë të tjerë u pozicionuan qartë kundër SHBA-së në fjalimin e tyre përmbyllës.

Justin Trudeau tha: “Ne jemi një vend diplomatik kur mundemi, por kur duhet që të luftojmë do të luftojmë fort, tha ai.

Gati 152,000 nga rreth 400,000 anëtarë të Partisë Liberale, e cila ka qeverisur Kanadanë për më shumë se 50 vjet që nga Lufta e Dytë Botërore, morën pjesë në votim.

Carney hyri në garën për udhëheqjen e partisë me një agjendë centriste të orientuar ekonomikisht. Në luftën tregtare me Shtetet e Bashkuara, ai dëshiron të vazhdojë kursin e rezistencës së vendosur të Trudeau.

Sipas një sondazhi nga CTV News, 40 përqind e kanadezëve besojnë se Carney do të ishte politikani më i mirë për të negociuar me Trump, dukshëm më shumë se mbështetja prej 26 përqind për liderin e konservatorëve dhe kundërshtarin e tij më të madh politik të brendshëm, Pierre Poilievre.