“Nderi i Kombit” Reshat Arbana, teksa festoi 85-vjetorin e lindjes, mes emocionesh, kujtimesh dhe lotësh, përcolli mesazhe të forta për publikun në këtë stacion të jetës së tij.

“Jeta qenka tre ditë: e djeshmja, e sotmja dhe e nesërmja. E nesërmja nuk dihet. Ta bëjmë sot atë që kemi për të bërë, mos ta lemë për nesër. Ta duam më shumë njëri-tjetrin. Ky ishte stacioni im i 85-të. Po në iksha nga kjo botë, zemra do më mbetet pas. Do iki me pishmanllëkun e madh që nuk e pashë këtë Shqipëri me një demokraci të vërtetë. T’i lëmë hasmëritë, sepse jeta është e shkurtër,” u shpreh aktori i shquar dhe ikona e skenës shqiptare.

Reshat Arbana është një prej figurave më të dashura për publikun shqiptar, për kontributin e tij të çmuar në kinematografi dhe teatër.

Ai ka sjellë në jetë mbi 40 personazhe në film dhe qindra role në skenë, duke u bërë një simbol i gjallë i shpirtit popullor, burrërisë, dhimbjes, revoltës dhe dashurisë për vendin.

Në 85-vjetorit e lindjes së tij, Arkivi Qendror Shtetëror i Filmit e uroi aktorin duke shfaqur dokumentarin “Përballë”, ku vetë Reshat Arbana ndalet tek rolet më të spikatura të karrierës së tij.