Strategji për të rritur rendimentin tuaj në punë

Nëse keni më shumë sesa 3 vjet në të njëjtin pozicion pune dhe ndiheni sikur keni “ngecur”, atëherë ju duhet urgjentisht të bëni diçka për të dalë nga kjo situatë. Nëse doni që të jeni ju personi i radhës që do të marrë rritjen në detyrë, atëherë duhet të thelloni më tej njohuritë tuaja në fushën profesionale.

Më poshtë do të lexoni disa strategji të cilat do t’ju ndihmojnë për të rritur performancën tuaj:

Përqendrohuni në ato fusha të cilat kanë nevojë për përmirësim. Ashtu siç thotë edhe një shprehje e vjetër “Askush nuk është perfekt” dhe një gjë e tillë është mëse e vërtetë. Pavarësisht se sa të aftë mund të jeni, gjithmonë ka vend për përmirësim. P.sh., ju mund të përmirësoni aftësitë tuaja në përgatitjen e raporteve përfundimtare. Mund të përmirësoni aftësitë tuaja komunikuese, etj.

Duhet të jeni sa më të përqendruar. Referuar artikullit të fundit të publikuar nga Susie Poppick  në CNBC “Pozicionet e punës me rendiment më të lartë”, rreth 75 për qind e punonjësve harxhojnë një mesatare prej 2 orësh punë duke u marrë me gjëra që nuk kanë lidhje të drejtpërdrejtë me punën. Të hapësh rrjetet sociale, të cilat në ditët e sotme janë shumë dhe sikur vetëm në disa prej tyre të lundrosh, harxhohet kohë e vyer. T’i përgjigjesh një miku me mesazh në celular, të shikosh lajmet në portale të ndryshme online, të flasësh me kolegët për çështje që s’kanë lidhje me punën, janë disa prej veprimtarive të konsideruara si joproduktive. Nëse një situatë e tillë ju duket familjare, ju këshillojmë që të mos bëni asnjërën prej tyre, gjë kjo që do të ndikonte edhe në rritjen e performancës tuaj në punë.

Të gjeni zgjedhje të reja për detyrat tuaja më të vështira. Çdokujt prej nesh mund t’i ketë qëlluar të përballet me detyra, realizimi i të cilave është shumë i vështirë dhe të shumtë janë ata që i shmangin me idenë që do t’i përfundojnë gjithmonë në një moment të dytë. Në raste të tilla, këshillohet që sa më parë ta zgjidhni një problem aq më të lehtë do ta keni për të përmbushur të gjitha detyrat e tjera. Mos kini druajtje të kërkoni ndihmë.

Shpenzoni rreth një orë në ditë duke mësuar diçka të re. Azhurnimi i vazhdueshëm me të rejat më të fundit do t’ju ndihmonte për të mbajtur mendjen tuaj gjithmonë në lëvizje dhe për të qenë gjithmonë të përditësuar me të rejat më të fundit. Çdo profesion është në zhvillim të vazhdueshem, të gjithë e dimë pikën e fillimit, por askush pikën e përfundimit, prandaj këshillohet që sipas profesionit që keni, të jeni gjithmonë në përditësim me të rejat më të fundit. Lexoni, lundroni në internet, ndiqni kurse të ndryshme profesionale por asnjëherë mos rrini pa ecur përpara, sikur edhe në qoftë se do t’i dedikoni të paktën vetëm një orë në ditë nga koha juaj.